ഡി ഗ്രൂപ്പിന്റെ ബാനറില് മാനുവല് ക്രൂസ് ഡാര്വിന് നിര്മ്മിച്ച് കെ സതീഷ് സംവിധാനം ചെയ്ത ടു മെന് എന്ന ചിത്രത്തിലെ ആദ്യഗാനം പുറത്തിറങ്ങി. പ്രശസ്ത ഗസല് ഗായകരായ റാസാബീഗം പാടിയ ഗാനം മമ്മൂട്ടി തന്റെ ഫേസ്ബുക്ക് പേജിലൂടെ പുറത്തിറക്കി. റാസാബീഗം ആദ്യമായാണ് സിനിമക്ക് വേണ്ടി പാടുന്നത്. അവരുടെ ‘സലാം ചൊല്ലി പിരിയും മുന്പേ’ എന്ന ഹിറ്റ് ഗാനമാണ് സിനിമക്ക് വേണ്ടി വീണ്ടും ഒരുക്കിയത്. ഇരുവരും ഗാനരംഗങ്ങളില് പാടി അഭിനയിക്കുകയും ചെയ്തു.
ഇര്ഷാദ് അലി, സംവിധായകന് എംഎ നിഷാദ് എന്നിവര് കേന്ദ്രകഥാപാത്രങ്ങളാകുന്ന ചിത്രത്തില് രണ്ജി പണിക്കര്, ബിനു പപ്പു, ലെന, സോഹന് സീനുലാല്, അനുമോള്, ഡോണി ഡാര്വിന്, ആര്യ, കൈലാഷ്, സുധീര് കരമന, മിഥുന് രമേഷ്, അര്ഫാസ്, സുനില് സുഗത, സാദിഖ് തുടങ്ങിയവരാണ് അഭിനയിക്കുന്നത്.
ഏറെക്കുറെ പൂര്ണമായും യുഎഇയില് ചിത്രീകരിച്ച സിനിമയുടെ തിരക്കഥ മുഹാദ് വെമ്പായത്തിന്റേതാണ്. തമിഴിലെ പ്രസിദ്ധ ക്യാമറാമാനായ സിദ്ധാര്ത്ഥ് രാമസ്വാമിയാണ് സിനിമാറ്റോഗ്രഫി നിര്വ്വഹിച്ചത്.
റഫീഖ് അഹമ്മദിന്റെ വരികള്ക്ക് ആനന്ദ് മധുസൂദനന് സംഗീതം നല്കുന്നു. വി. ഷാജന് എഡിറ്റിംഗ് നിര്വ്വഹിച്ചു. ഡാനി ഡാര്വിനും ഡോണി ഡാര്വിനുമാണ് എക്സിക്യൂട്ടീവ് പ്രൊഡ്യൂസര്മാര്. ചിത്രം ഉടന് തീയേറ്ററുകളില് എത്തും.