രോഗശാന്തി ശുശ്രൂഷയുടെ പേരില് നടക്കുന്ന തട്ടിപ്പുകളെ തുറന്നു കാട്ടുന്ന ഫഹദ് ഫാസില് ചിത്രം ട്രാന്സ് സിനിമക്കെതിരെ പാസ്റ്റര് രംഗത്ത്. സിനിമയുടെ അഭിനേതാക്കളെയും അണിയറ പ്രവര്ത്തകരെയും “ശപിക്കുന്ന” പാസ്റ്ററുടെ വീഡിയോ സോഷ്യല് മീഡിയയില് വൈറലായി കഴിഞ്ഞു. സിനിമയെടുക്കാന് കഥ ഇല്ലാതായതു കൊണ്ടാണ് പാസ്റ്റേഴ്സിന്റെ പേരില് സിനിമ എടുക്കുന്നതെന്ന് പാസ്റ്റര് പറയുന്നു. ഇങ്ങനെ ചെയ്തതു കൊണ്ട് തങ്ങള്ക്ക് ഒന്നും പറ്റാന് പോകുന്നില്ലെന്നും എന്നാല് ചിത്രം എടുത്തവര്ക്കും അഭിനയിച്ചവര്ക്കും ഇനി അങ്ങോട്ട് ദുരിതമായിരിക്കുമെന്നും വീഡിയോയില് പാസ്റ്റര് പറയുന്നു.
“ജീവനോടെ ഇല്ലാത്ത ദിനോസറിന്റെ പേരില് സിനിമയെടുത്ത് സംവിധായകനും നിര്മ്മാതാവും കുറേ കാശുണ്ടാക്കി. സിനിമ ഒന്നുമില്ലാഞ്ഞിട്ട് പാസ്റ്റേഴ്സാണ് വിഷയം. നീ ആവശ്യം പോലെ സിനിമ ഞങ്ങടെ പേര് വച്ച് പിടിച്ച് ഞം ഞം വച്ച് തിന്ന്, എന്താ കൊഴപ്പം, അതൊരു വിടുതല് അല്ലേ. പേരിടാന് അറിയത്തില്ലേ ഞങ്ങള് ഇട്ട് തരാം സാറേ, ഈ പെന്തക്കോസ്തിന്റെ സഭകളില് ലക്ഷങ്ങള് കോടികള് ഇത് വരെ വന്നിട്ടില്ല. നമ്മുടെ കാര്യം ആരും സിനിമ എടുക്കുന്നില്ലല്ലോ എന്ന് ചിന്തിച്ച് ഇരിക്കുകയായിരുന്നു, അത് ഏതായാലും നടന്നു. എടുത്തവര്ക്കും കഴിച്ചവര്ക്കും അഭിനയിച്ചവര്ക്കും സൊഖവാ, ഇനിയങ്ങോട്ട് സൊഖവാ, തമ്പുരാന്റെ കൃപ അതിന്റെ മേല് വ്യാപരിക്കും.” പാസ്റ്റര് വിഡിയോയില് പറയുന്നു.