മണിരത്നം-കമല് ഹാസന് കോമ്പോയില് ഒരുങ്ങുന്ന ‘തഗ് ലൈഫ്’ ചിത്രത്തിലെ നടന് ചിമ്പുവിന്റെ ക്യാരക്ടര് പോസ്റ്ററും ടീസറും പുറത്ത്. ബോര്ഡര് പട്രോള് വാഹനത്തില് മണലാരണ്യത്തില് കുതിച്ചു പായുന്ന സിമ്പുവിനെയാണ് ടീസറില് കാണാനാവുക. കൈയില് തോക്കുമായി തീപ്പൊരി ലുക്കിലാണ് നടന്റെ എന്ട്രി.
ന്യൂ തഗ് ഇന് ടൗണ് എന്ന അടിക്കുറിപ്പോടുകൂടി പങ്കുവയ്ക്കപ്പെട്ട പോസ്റ്റര് സൂചിപ്പിക്കുന്നത് ചിത്രത്തില് ആക്ഷന് കൂടുതല് പ്രാധാന്യം ഉണ്ടെന്നാണ്. അതേസമയം, ദുല്ഖര് സല്മാന് പിന്മാറിയതോടെയാണ് ചിത്രത്തിലേക്ക് ചിമ്പു എത്തിയത്. മറ്റ് ഷൂട്ടിംഗ് തിരക്കുകള് ഉള്ളതിനാലാണ് ദുല്ഖര് തഗ് ലൈഫ് ഉപേക്ഷിച്ചത്.
ദുല്ഖറിന് പിന്നാലെ നടന് ജയം രവിയും ചിത്രത്തില് നിന്നും പിന്നോട്ട് പോയിരുന്നു. ഈ റോളിലേക്ക് അശോക് സെല്വന് എത്തുമെന്നാണ് റിപ്പോര്ട്ടുകള്. 1987ല് പുറത്തിറങ്ങിയ ‘നായകന്’ ശേഷം മണിരത്നവും കമലും ഒന്നിക്കുന്നു എന്നതാണ് തഗ് ലൈഫിന്റെ ഏറ്റവും വലിയ പ്രത്യേകത.
എ.ആര് റഹ്മാനാണ് സിനിമയുടെ സംഗീത സംവിധാനം നിര്വ്വഹിക്കുന്നത്. രവി കെ ചന്ദ്രന് ഛായാഗ്രഹണവും ശ്രീകര് പ്രസാദ് എഡിറ്റിംഗും അന്പറിവ് സംഘട്ടന സംവിധാനവും നിര്വ്വഹിക്കുന്നു. രാജ്കമല് ഫിലിംസ് ഇന്റര്നാഷണല്, മദ്രാസ് ടാക്കീസ്, റെഡ് ജയന്റ് മൂവീസ്, ആര് മഹേന്ദ്രന്, ശിവ അനന്ത് എന്നിവര് ചേര്ന്നാണ് ചിത്രത്തിന്റെ നിര്മ്മാണം.