സുന്ദര്‍ സിയുടെ ഹൊറര്‍ ത്രില്ലറായ അരണ്‍മനൈയുടെ മൂന്നാം ഭാഗം ഒരുങ്ങുന്നു. ചിത്രത്തെ കുറിച്ചുള്ള പുതിയ വിശേഷങ്ങളാണ് വാര്‍ത്തകളില്‍ നിറയുന്നത്. നടന്‍ ആര്യ, റാഷി ഖന്ന, ആന്‍ഡ്രിയ ജൊറോമിയ സാക്ഷി അഗര്‍വാള്‍ എന്നിവരാണ് മൂന്നാം ഭാഗത്തില്‍ കേന്ദ്ര കഥാപാത്രങ്ങളാകുന്നത്.
ഇത്തവണ ചിത്രത്തില്‍ പ്രേതമായി എത്തുന്നത് നടന്‍ ആര്യയാണ് എന്ന റിപ്പോര്‍ട്ടുകളാണ് പുറത്തു വരുന്നത്. അരണ്‍മനൈയുടെ ആദ്യ രണ്ട് ഭാഗങ്ങളിലും നടി ഹന്‍സിക മോട്വാനിയാണ് പ്രേതത്തിന്റെ വേഷത്തില്‍ എത്തിയത്. യോഗി ബാബുവും വിവേകും മൂന്നാം ഭാഗത്തില്‍ വേഷമിടും.
എങ്കേയും എപ്പോതും ചിത്രത്തിന് സംഗീതം ഒരുക്കിയ സത്യയാണ് ചിത്രത്തിനും സംഗീതം ഒരുക്കുക. ചിത്രത്തിന്റെ ഷൂട്ടിംഗ് ജയ്പൂരിലെ കൊട്ടാരത്തില്‍ ആരംഭിച്ചിരുന്നെങ്കിലും കോവിഡ് ലോക്ഡൗണിനിടെ നിര്‍ത്തിവെയ്ക്കുകയായിരുന്നു.
ഹന്‍സിക, ആന്‍ഡ്രിയ, റായ് ലക്ഷ്മി, വിനയ് രവി, സുന്ദര്‍ എന്നിവരാണ് അരണ്‍മനൈയുടെ ആദ്യ ഭാഗത്തില്‍ കേന്ദ്ര കഥാപാത്രങ്ങളായെത്തിയത്. സിദ്ധാര്‍ഥ്, തൃഷ, സുന്ദര്‍, പൂനം ബജ്‌വ, ഹന്‍സിക എന്നിവരാണ് രണ്ടാം ഭാഗത്തില്‍ വേഷമിട്ടത്. സുന്ദര്‍ തന്നെയാണ് ചിത്രത്തിന്റെ രചനയും സംവിധാനവും. ഖുശ്ബു ആണ് ചിത്രം നിര്‍മ്മിച്ചത്.
