മലയാളത്തിലെ യുവതാരങ്ങളെ അണിനിരത്തി ഒരു ത്രില്ലര്‍ ചിത്രം സംവിധായകന്‍ പ്രിയദര്‍ശന്‍ ഒരുക്കാനൊരുങ്ങുന്നു എന്ന റിപ്പോര്‍ട്ടര്ട്ടുകള്‍ അടുത്തിടെ പുറത്തുവന്നിരുന്നു. റോഷന്‍ മാത്യു, ഷൈന്‍ ടോം ചാക്കോ, അര്‍ജുന്‍ അശോകന്‍ തുടങ്ങിയ താരങ്ങളാണ് ചിത്രത്തില്‍ കേന്ദ്രകഥാപാത്രങ്ങളായി എത്തുന്നതെന്നായിരുന്നു വിവരം.
ഇപ്പോഴിത നിര്‍മാതാവും പ്രൊഡക്ഷന്‍ കണ്‍ട്രോളറുമായ ബാദുഷ പുറത്തു വിട്ട ഒരു ചിത്രം ഈ സൂചനകള്‍ക്ക് വീണ്ടും ചിറകു നല്‍കിയിരിക്കുകയാണ്. പ്രിയദര്‍ശനും ഷൈന്‍ ടോം ചാക്കോക്കും ഷെയിന്‍ നിഗമിനുമൊപ്പമുള്ള ഒരു ചിത്രമാണ് അദ്ദേഹം പുറത്തു വിട്ടത്. അതേ ചിത്രം തന്നെ പോസ്റ്റ് ചെയ്തു കൊണ്ട് ഷൈന്‍ ടോം ചാക്കോ കുറിച്ചിരിക്കുന്നത് റോളിംഗ് സൂണ്‍ എന്നാണ്.
പ്രിയദര്‍ശന്‍ തിരക്കഥയെഴുതി സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് ഓഗസ്റ്റില്‍ തുടങ്ങുമെന്നാണ് വിവരം. എറണാകുളവും തൊടുപുഴയുമാണ് ലൊക്കേഷനുകള്‍. നിര്‍മ്മാണത്തില്‍ ബാദുഷയ്‌ക്കൊപ്പം പ്രിയദര്‍ശന്‍ പങ്കാളിയാകുന്നുണ്ടെന്നാണ് റിപ്പോര്‍ട്ട്.
ചിത്രത്തെ കുറിച്ചുള്ള പ്രഖ്യാപനം അടുത്ത് തന്നെ ഉണ്ടാകുമെന്നാണ് കരുതുന്നത്. ഇതിന് പുറമേ എംടി വാസുദേവന്‍ നായരുടെ തിരക്കഥയില്‍ മോഹന്‍ലാലിനെ നായകനാക്കി ഓളവും തീരവും എന്ന ചിത്രവും പ്രിയദര്‍ശന്‍ ഈ വര്‍ഷം സംവിധാനം ചെയ്യുന്നുണ്ട്.
1957 ല്‍ പുറത്തിറങ്ങിയ എംടിയുടെ ചെറുകഥയാണ് ‘ഓളവും തീരവും’. മോഹന്‍ലാല്‍ ചിത്രത്തില്‍ ബാപ്പൂട്ടി എന്ന കഥാപാത്രത്തെയാകും അവതരിപ്പിക്കുക. 1970 ല്‍ പിഎന്‍ മേനോന്റെ സംവിധാനത്തില്‍ ചെറുകഥ സിനിമയാക്കിയിരുന്നു. സന്തോഷ് ശിവനായിരിക്കും ചിത്രത്തിനായി ക്യാമറ ചെയ്യുന്നത്.