മോഹന്ലാല്- തരുണ് മൂര്ത്തി കൂട്ടുകെട്ടില് വരുന്ന പുതിയ ചിത്രം തുടരും റിലീസിനൊരുങ്ങുകയാണ്. എപ്രില് 25നാണ് സിനിമ തിയേറ്ററുകളിലേക്ക് എത്തുന്നത്. ഒരിടവേളയ്ക്ക് ശേഷം മോഹന്ലാല്-ശോഭന കൂട്ടുകെട്ട് വീണ്ടും ഒന്നിക്കുന്നുവെന്ന പ്രത്യേകതയോടെയാണ് ചിത്രം എത്തുന്നത്. അതേസമയം ശോഭനയ്ക്ക് മുന്പ് സിനിമയിലെ നായികാവേഷത്തിനായി നടി ജ്യോതികയെ പരിഗണിച്ചിരുന്നുവെന്ന് തുറന്നുപറയുകയാണ് സംവിധായകന് തരുണ് മൂര്ത്തി.
“ലളിത എന്ന കഥാപാത്രത്തിനായി തങ്ങളുടെ മനസില് ശോഭന തന്നെയായിരുന്നു ആദ്യമുണ്ടായിരുന്നതെന്ന് തരുണ് മൂര്ത്തി പറയുന്നു. എന്നാല് അവരിലേക്ക് എങ്ങനെ എത്തുമെന്നായിരുന്നു ഞങ്ങള് ആലോചിച്ചത്. പിന്നീട് ലാല് സാറിനൊപ്പം ഇതുവരെ കാണാത്ത കോമ്പിനേഷന് നോക്കാമെന്ന് തീരുമാനിച്ചു. അങ്ങനെയാണ് ജ്യോതികയെ ഈ കഥാപാത്രത്തിലേക്ക് ആലോചിച്ചത്. ജ്യോതിക മാഡത്തെ കാണുന്നതിനായി അവരുടെ വീട്ടിലേക്ക് പോയി. ഞാന് കഥ പറഞ്ഞപ്പോള് അവര് വളരെ എക്സൈറ്റഡായിരുന്നു. എന്നാല് ഡേറ്റ് ക്ലാഷ് മൂലം അവര്ക്ക് സിനിമയുടെ ഭാഗമാകാന് സാധിക്കാതെ വരികയും ശോഭന മാഡത്തെ തന്നെ വിളിക്കാന് തീരുമാനിക്കുകയുമായിരുന്നു, റെഡ് എഫ് എമ്മിന് നല്കിയ അഭിമുഖത്തില് തരുണ് മൂര്ത്തി പറഞ്ഞു.
തുടരും സിനിമയുടെതായി നേരത്തെ പുറത്തിറങ്ങിയ ട്രെയിലറും പാട്ടുകളുമെല്ലാം തന്നെ സോഷ്യല് മീഡിയയില് സിനിമ പ്രേമികള് ഏറ്റെടുത്തിരുന്നു. എമ്പുരാന് മുന്പ് റിലീസ് ചെയ്യേണ്ടിയിരുന്ന സിനിമ ചില കാരണങ്ങളാല് നീട്ടിവെക്കുകയായിരുന്നു. രജപുത്ര വിഷ്വല് മീഡിയയുടെ ബാനറില് രജപുത്ര രഞ്ജിത്താണ് സിനിമ നിര്മ്മിച്ചിരിക്കുന്നത്. മണിയന്പിളള രാജു, ബിനു പപ്പു, ഇര്ഷാദ്, തോമസ് മാത്യൂ തുടങ്ങിയവരാണ് സിനിമയിലെ മറ്റുതാരങ്ങള്.