കേരളത്തില് അപ്രതീക്ഷിത തരംഗം സൃഷ്ടിച്ച് തണ്ണീര്മത്തന് ദിനങ്ങള് വിജയകരമായി പ്രദര്ശനം തുടരുകയാണ്. വലിയ താരനിര ഇല്ലാതിരുന്നിട്ടും വന് സ്വീകാര്യതയാണ് ചിത്രത്തിന് ലഭിച്ചു കൊണ്ടിരിക്കുന്നത്. ഏരീസ് പ്ലക്സില് ലൂസിഫറിനെ വരെ കടത്തിവെട്ടിയ തണ്ണീര്മത്തന്റെ മുന്നേറ്റം മലയാള സിനിമാ ലോകത്തെ തന്നെ ഞെട്ടിച്ചു. ഇപ്പോഴിതാ ചിത്രത്തിന്റെ കളക്ഷന് റിപ്പോര്ട്ട് ഔദ്യോഗികമായി പ്രഖ്യാപിച്ചിരിക്കുകയാണ് അണിയറ പ്രവര്ത്തകര്.
രണ്ട് കോടി രൂപ ചിലവില് ഒരുങ്ങിയ ചിത്രം ഇതുവരെ വാരിയത് 45 കോടിയാണ്. ചിത്രത്തിന്റെ അണിയറ പ്രവര്ത്തകര് ഫെയ്സ്ബുക്ക് പേജിലൂടെയാണ് കളക്ഷന് വിവരം ആരാധകരുമായി പങ്കുവെച്ചത്. വലിയ താരനിര ഇല്ലാതിരുന്നിട്ടും മികച്ച കളക്ഷന് നേടിയ ചിത്രം ഏവരെയും അത്ഭുതപ്പെടുത്തിയിരിക്കുകയാണ്. വമ്പന് ബജറ്റോ മുന്നിര താരങ്ങളും മാത്രമല്ല ചിത്രത്തിന്റെ വിജയം നിര്ണയിക്കുന്നത് എന്നതിന് തെളിവാണ് തണ്ണീര്മത്തന് ദിനങ്ങള്.
പുതുമുഖങ്ങളെ അണിനിരത്തി ഗിരീഷ് എഡി സംവിധാനം ചെയ്ത സിനിമയാണ് തണ്ണീര്മത്തന് ദിനങ്ങള്. ജോമോന് ടി ജോണ് ആണ് തണ്ണീര്മത്തന് ദിനങ്ങള്ക്ക് ക്യാമറ കൈകാര്യം ചെയ്തത്. കുമ്പളങ്ങി നൈറ്റ്സിലൂടെ ശ്രദ്ധേയനായ മാത്യൂ തോമസ് നായകനും, ഉദാഹരണം സുജാത എന്ന ചിത്രത്തിലൂടെ വെള്ളിത്തിരയിലെത്തിയ അനശ്വര രാജനാണ് കേന്ദ്രകഥാപാത്രം ചെയ്തിരിക്കുന്നത്. വിനീത് ശ്രീനിവാസനാണ് മറ്റൊരു കേന്ദ്രകഥാപാത്രത്തെ അവതരിപ്പിച്ചിരിക്കുന്നത്. പ്ലസ്ടു കാലഘട്ടത്തില് ഉണ്ടാവുന്ന പ്രണയവും സൗഹൃദവും സംഘര്ഷങ്ങളുമെല്ലാമാണ് സിനിമയുടെ പ്രമേയം.