വളരെ നാളുകളായി സിനിമ പ്രേക്ഷകര്ക്കിടയില് ചര്ച്ചയാകുകയാണ് സൂര്യ 42. ശിവ കഥയെഴുതി സംവിധാനം ചെയ്യുന്ന ചിത്രം പ്രഖ്യാപനം മുതല് തന്നെ ശ്രദ്ധ നേടിയിരുന്നു.. ഇപ്പോഴിത ചിത്രത്തെ സംബന്ധിക്കുന്ന പുതിയ വിവരം പുറത്തുവന്നിരിക്കുകയാണ്.കങ്കുവ (Kanguva) എന്നാണ് സൂര്യ 42 വിന്റെ പേര്.
അതേസമയം, ചിത്രത്തിലെ സൂര്യ (suriya) യുടെ ലുക്കിനെക്കുറിച്ച് കൂടുതലൊന്നും അണിയറപ്രവര്ത്തകര് പുറത്തുവിട്ടിട്ടില്ല. അണിയറപ്രവര്ത്തകര് പുറത്തുവിട്ട 1 മിനിറ്റും 16 സെക്കന്ഡും ദൈര്ഘ്യമുള്ള വീഡിയോയില് ഒരു പരുന്തിനേയും ഒരു നായയേയും കുതിരയേയും കാണാം.
‘ആയിരക്കണക്കിന് വര്ഷങ്ങള്ക്ക് മുന്പ് തമിഴ്നാട്ടില് ജീവിച്ചിരുന്ന ഒരു ട്രൈബിന്റെ പേരാണ് കങ്കുവ. വൈക്കിങുകള്ക്കും മുന്പ് ജീവിച്ചിരുന്നവരാണിവര്. വൈക്കിങുകളോട് സാമ്യമുള്ള രീതിയില് മറ്റ് ഗോത്രങ്ങളെ യാതൊരു ദയയും ഇല്ലാതെ വേട്ടയാടിയാണ് ഉപജീവനം നടത്തിയിരുന്നത്.
അന്നത്തെ കാലത്ത് പൊതു സമൂഹമായി അകല്ച്ചയില് ജീവിച്ചിരുന്നത് കൊണ്ടാണ് ഇതെന്ന് കണക്കാക്കുന്നു. ഇവരെ കുറിച്ച് ലഭ്യമായതില് ഏറ്റവും പ്രസിദ്ധമായ ഒരു പരാമര്ശം ഇങ്ങനെ ആണ്. കങ്കുവകളേ കാണുന്നതും കാലനെ കാണുന്നതും ഒരുപോലെ ആണ്’- എന്നാണ് ഒരു സോഷ്യല് മീഡിയ ഉപയോക്താവ് ഇന്സ്റ്റഗ്രാമില് കുറിച്ചിരിക്കുന്നത്.
അതേസമയം സൂര്യയുടെ കരിയറിലെ ഏറ്റവും ചെലവേറിയ പ്രൊജക്ടുകളില് ഒന്നാണ് കങ്കുവ എന്നാണ് പറയപ്പെടുന്നത്. ത്രിഡിയിലാണ് ചിത്രമെത്തുക. ഹിസ്റ്റോറിക്കല് ഫിക്ഷനായി ഒരുങ്ങുന്ന ചിത്രം ഇതിനോടകം തന്നെ വന് ഹൈപ്പ് നേടിയിരുന്നു. ദിഷ പടാനി, യോഗി ബാബു എന്നിവരും ചിത്രത്തില് പ്രധാന വേഷത്തിലെത്തുന്നുണ്ട്. കോവൈ സരള, ആനന്ദ് രാജ്, റെഡിന് കിംഗ്സ്ലി, രവി രാഘവേന്ദ്ര തുടങ്ങിയവരും മറ്റു വേഷങ്ങളിലെത്തുന്നു.