തെന്നിന്ത്യന്‍ സിനിമാപ്രേമികള്‍ക്കിടയില്‍ ആവേശം സൃഷ്ടിച്ച് സൂര്യയുടെ ‘കങ്കുവ’ ചിത്രത്തിന്റെ പോസ്റ്റര്‍. സിരുത്തൈ ശിവ സംവിധാനം ചെയ്യുന്ന ചിത്രം ഹിസ്റ്റോറിക്കല്‍ ഫിക്ഷനാണ് എന്നാണ് സൂചന. ചിത്രത്തിന്റെ രണ്ടാമത്തെ പോസ്റ്റര്‍ എത്തിയതോടെ ടൈം ട്രാവല്‍ ആണോ അതോ പുനര്‍ജന്മമാണോ എന്ന ചര്‍ച്ചകളും ഉയരുന്നുണ്ട്.
”സമയത്തേക്കാള്‍ ശക്തമായ വിധി. ഭൂതവും വര്‍ത്തമാനവും ഭാവിയും. എല്ലാത്തിലും മുഴങ്ങുന്നത് ഒരേ പേര്, കങ്കുവ” എന്ന ക്യാപ്ഷനോടെയാണ് സൂര്യ പോസ്റ്റര്‍ പങ്കുവച്ചിരിക്കുന്നത്. ബിഗ് ബജറ്റില്‍ ഒരുങ്ങുന്ന സിനിമയില്‍ 1000 വര്‍ഷങ്ങള്‍ക്ക് മുമ്പുള്ള കാലഘട്ടത്തിലെ യോദ്ധാവായാണ് സൂര്യ എത്തുന്നത്.
ത്രീഡിയില്‍ പാന്‍ ഇന്ത്യന്‍ ചിത്രമായാണ് കങ്കുവ ഒരുങ്ങുന്നത്. സ്റ്റുഡിയോ ഗ്രീനിന്റെ ബാനറില്‍ ഇ.വി ജ്ഞാനവേല്‍ രാജ നിര്‍മ്മിക്കുന്ന ചിത്രത്തിന് തിരക്കഥ എഴുതുന്നത് ആദി നാരായണയാണ്. ദിഷ പഠാണിയാണ് ചിത്രത്തില്‍ സൂര്യയുടെ നായികയായി എത്തുന്നത്.
ദേവി ശ്രീ പ്രസാദാണ് ചിത്രത്തിന് സംഗീതമൊരുക്കുന്നത്. അടുത്ത വര്‍ഷം പകുതിയോടെ ചിത്രം തിയേറ്ററുകളില്‍ എത്തുമെന്നാണ് പ്രതീക്ഷിക്കുന്നത്. ബിഗ് ബഡ്ജറ്റില്‍ ഒരുങ്ങുന്ന ചിത്രം സൂര്യയുടെ കരിയറിലെ ഏറ്റവും വലിയ ചിത്രം കൂടിയാണ്.
എന്ത് തന്നെയായാലും വരാനിരിക്കുന്നത് ഇന്ത്യന്‍ സിനിമ കാണാന്‍ പോവുന്ന വിസ്മയം തന്നെയാണ് എന്നാണ് ആരാധകര്‍ വിലയിരുത്തുന്നത്. ചിത്രം തമിഴിന് പുറമെ ഹിന്ദി, മലയാളം, തെലുങ്ക് തുടങ്ങി പത്ത് ഭാഷകളില്‍ മൊഴിമാറ്റം ചെയ്താണ് റിലീസ് ചെയ്യുക. ബോളിവുഡ് താരം ബോബി ഡിയോളാണ് പ്രതിനായക വേഷത്തില്‍ എത്തുക.