വയനാട് ഉരുള്പ്പൊട്ടല് ദുരന്തത്തിന്റെ പശ്ചാത്തലത്തില് സഹായഹസ്തം നീട്ടി സൂര്യയും ജ്യോതികയും കാര്ത്തിയും. 50 ലക്ഷം രൂപയാണ് ഇവര് മുഖ്യമന്ത്രിയുടെ ദുരിതാശ്വാസ നിധിയിലേക്ക് കൈമാറിയിരിക്കുന്നത്. ഇവരുടെ മാനേജേഴ്സ് ആണ് ഇക്കാര്യം സ്ഥിരീകരിച്ചത്.
വയനാട്ടിലെ ദുരിതബാധിതര്ക്കായി മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള സഹായങ്ങള് ലോകത്തിന്റെ വിവിധഭാഗങ്ങളില് നിന്ന് എത്തുകയാണ്. 35 ലക്ഷം രൂപയും മറ്റ് സഹായങ്ങളുമാണ് മമ്മൂട്ടിയും ദുല്ഖര് സല്മാനും ചേര്ന്ന് നല്കിയിരിക്കുന്നത്.
ദുരിതാശ്വാസ സഹായവുമായി എറണാകുളം ജില്ലാ ഭരണകൂടത്തിന്റെ വയനാട്ടിലേക്കുള്ള ആദ്യ വണ്ടി മമ്മൂട്ടി ഫ്ളാഗ് ഓഫ് ചെയ്തു. വയനാടിന് കൈത്താങ്ങായി മമ്മൂട്ടിയുടെ കെയര് ആന്ഡ് ഷെയര് ഫൗണ്ടേഷന് വഴി മറ്റ് സഹായങ്ങളും വയനാടിനായി മമ്മൂട്ടി എത്തിക്കുന്നുണ്ട്. വയനാടിന് കൈത്താങ്ങായി രശ്മിക മന്ദാന 10 ലക്ഷം സഹായധനം നല്കിയിട്ടുണ്ട്.
കഴിഞ്ഞ ദിവസം നടന് ചിയാന് വിക്രവും മുഖ്യമന്ത്രിയുടെ ദുരിതാശ്വാസ നിധിയിലേക്ക് 20 ലക്ഷം രൂപയുടെ സംഭാവന നല്കി മുന്നോട്ട് വന്നിരുന്നു. അതേസമയം, കനത്ത മഴയെ തുടര്ന്ന് മുണ്ടക്കൈയിലെ രക്ഷാപ്രവര്ത്തകരെ തിരിച്ചിറക്കിയിരിക്കുകയാണ്. ഉരുള്പൊട്ടലിന്റെ പ്രഭവകേന്ദ്രമായ പുഞ്ചിരിമട്ടത്തും കനത്ത മഴ പെയ്യുകയാണ്.
പ്രതികൂല കാലാവസ്ഥയിലും ചൂരല് മലയിലെ ബെയ്ലി പാലം നിര്മ്മാണം അവസാന ഘട്ടത്തിലേക്ക് നീങ്ങുകയാണ്. ആര്മിയുടെ നേതൃത്വത്തില് നിര്മ്മാണം വേഗത്തില് പുരോഗമിക്കുകയാണ്. അതിനിടയില് മുഖ്യമന്ത്രി പിണറായി വിജയന് ചൂരല്മല സന്ദര്ശിച്ചു.
കോണ്ഗ്രസ് നേതാക്കളായ രാഹുല് ഗാന്ധിയും പ്രിയങ്കാ ഗാന്ധിയും ചൂരല്മലയില് സന്ദര്ശനം നടത്തി. കെസി വേണുഗോപാല്, വിഡി സതീശന് അടക്കമുള്ള കോണ്ഗ്രസ് നേതാക്കള്ക്കൊപ്പം രാഹുലും പ്രിയങ്കയും ചൂരലമലയിലെ രക്ഷാപ്രവര്ത്തനം നടക്കുന്ന സഥലങ്ങള് സന്ദര്ശിച്ചത്.