മുൻ ഇന്ത്യൻ ക്രിക്കറ്റ് താരവും സിഎസ്കെ ആരാധകരുടെ സ്വന്തം ചിന്നത്തലയുമായ സുരേഷ് റെയ്ന സിനിമയിലേക്ക്. അണിയറയിൽ ഒരുങ്ങുന്ന ഒരു തമിഴ് ചിത്രത്തിലൂടെയാണ് റെയ്ന സിനിമയിൽ അരങ്ങേറ്റം കുറിക്കാൻ തയ്യാറെടുക്കുന്നത്. ക്രിക്കറ്റ് ആസ്പദമാക്കി എടുക്കുന്ന ചിത്രം ലോഗൻ എന്ന സംവിധായകനാണ് ഒരുക്കുന്നത്. അതേസമയം ഇത് സുരേഷ് റെയ്നയുടെ ബയോപിക് ആകാനും സാധ്യതയുണ്ടെന്ന് റിപ്പോർട്ടുകൾ വരുന്നു. ചെന്നൈയിൽ വച്ച് വെള്ളിയാഴ്ചയാണ് സിനിമ ഔദ്യോഗികമായി ലോഞ്ച് ചെയ്ത്.
ഡ്രീം നൈറ്റ് സ്റ്റോറീസ് എന്ന പ്രൊഡക്ഷൻ ഹൗസിന്റെ ബാനറിൽ ശരവണ കുമാറാണ് ചിത്രം നിർമ്മിക്കുന്നത്. സിനിമയുടെ പേരോ മറ്റു അഭിനേതാക്കളുടെ വിവരമോ പുറത്തുവന്നിട്ടില്ല. സന്ദീപ് കെ വിജയ് ആണ് ചിത്രത്തിന്റെ ഛായാഗ്രാഹകൻ, ടി മുത്തുരാജ്- പ്രൊഡക്ഷൻ ഡിസൈനർ, സുപ്രീം സുന്ദർ- സ്റ്റണ്ട് കൊറിയോഗ്രാഫർ. ഓസ്കർ ജേതാവ് റസൂൽ പൂക്കുട്ടിയാണ് സൗണ്ട് ഡിസൈനർ, സന്തോഷ് നാരായണൻ സംഗീതം ഒരുക്കുന്നു.
ക്രിക്കറ്റിൽ നിന്നും വിരമിച്ച ശേഷം കമന്റേറ്ററുടെ റോളിലാണ് സുരേഷ് റെയ്നയെ ഇപ്പോൾ ആരാധകർ കാണാറുളളത്. 2020ൽ മുൻ ഇന്ത്യൻ ക്യാപ്റ്റൻ എംഎസ് ധോണി വിരമിച്ച അതേ സമയം തന്നെയാണ് റെയ്നയും തന്റെ വിരമിക്കൽ പ്രഖ്യാപിച്ചത്. ഐപിഎലിൽ ചെന്നൈ സൂപ്പർ കിംഗ്സിനായി കൂടുതൽ കാലവും കളിച്ച റെയ്ന ഇടയ്ക്ക് ഗുജറാത്ത് ലയൺസ് ടീമിന്റെയും താരമായിരുന്നു.