സുരേഷ് ഗോപി ചിത്രം “കാവല്‍” തിയേറ്ററില്‍ തന്നെ റിലീസ് ചെയ്യും. സുരേഷ് ഗോപിയുടെ ഔദ്യോഗിക ഇന്‍സ്റ്റഗ്രാംപേജില്‍ ഇക്കാര്യം വ്യക്തമാക്കിയിരിക്കുന്നത്. ജനം എന്ന് തിയേറ്ററില്‍ എത്തുമോ അന്നാണ് സിനിമ റിലീസ് ചെയ്യുക എന്ന് സംവിധായകന്‍ നിതിന്‍ രഞ്ജി പണിക്കര്‍ സ്ഥിരീകരിച്ചതായാണ് ഇന്‍സ്റ്റഗ്രാമില്‍ കുറിച്ചിരിക്കുന്നത്.
ഹൈറേഞ്ച് പശ്ചാത്തലത്തില്‍ രണ്ടു കാലഘട്ടത്തിന്റെ കഥ ദൃശ്യവത്കരിക്കുന്ന കാവല്‍ ആക്ഷന്‍ ഫാമിലി ഡ്രാമ ആയാണ് ഒരുങ്ങുന്നത്. ലാലും ചിത്രത്തില്‍ ശ്രദ്ധേയമായ വേഷത്തില്‍ എത്തുന്നുണ്ട്. നവംബര്‍ ആദ്യമാണ് കാവല്‍ ചിത്രത്തിന്റെ ഷൂട്ടിംഗ് പൂര്‍ത്തിയായത്.
സയാ ഡേവിഡ്, ഐ.എം വിജയന്‍, അലന്‍സിയര്‍, പത്മരാജ് രതീഷ്, സുജിത് ശങ്കര്‍, സന്തോഷ് കീഴാറ്റൂര്‍, കിച്ചു ടെല്ലസ്, ബിനു പപ്പു, മോഹന്‍ ജോസ്, കണ്ണന്‍ രാജന്‍ പി ദേവ്, മുരുകന്‍, മുത്തുമണി തുടങ്ങിയവരാണ് ചിത്രത്തിലെ മറ്റു പ്രധാന താരങ്ങള്‍.
ഗുഡ്‌വില്‍ എന്റര്‍ടെയ്ന്‍മെന്റിന്റെ ബാനറില്‍ ജോബി ജോര്‍ജ്ജ് ആണ് ചിത്രം നിര്‍മ്മിക്കുന്നത്. നിഖില്‍ എസ്. പ്രവീണ്‍ ഛായാഗ്രഹണവും രഞ്ജിന്‍ രാജ് സംഗീതവും ഒരുക്കുന്നു. ലോക്ഡൗണ്‍ തുടങ്ങിയ വേളയില്‍ ചിത്രീകരണം നിര്‍ത്തിവെച്ചിരുന്നെങ്കിലും തുടര്‍ന്ന് ഒക്ടോബര്‍ അവസാനത്തോടെ ഷൂട്ടിംഗ് പുനരാരംഭിക്കുകയായിരുന്നു.