കോടതി കുറ്റക്കാരനാണെന്ന് കണ്ടെത്തുന്നതുവരെ ആരെയും കുറ്റവാളിയായി കാണരുതെന്ന് നടൻ സുരേഷ് ഗോപി. സ്വപ്നാ സുരേഷിന്റെയും ദിലീപിന്റെയും കേസുകളിൽ ഇതാണ് തന്റെ നിലപാടെന്നും തന്റെ രാഷ്ട്രീയ നിലപാട് നോക്കി ആരും സിനിമ വിലയിരുത്താറില്ല എന്നും സുരേഷ് ഗോപി ദുബായിൽ മാധ്യമങ്ങളോട് പറഞ്ഞു.
‘ഗരുഡൻ’ എന്ന തന്റെ പുതിയ ചിത്രത്തിന്റെ പ്രചാരണവുമായി ബന്ധപ്പെട്ടാണ് സുരേഷ് ഗോപി ദുബായിൽ എത്തിയത്. സുരേഷ് ഗോപിയ്ക്കൊപ്പം മറ്റ് താരങ്ങളും എത്തിയിരുന്നു. ചിലരെ മനഃപൂർവം പ്രതികളാക്കുന്ന വിധത്തിൽ പോലീസ് നടപടികൾ ഉണ്ടാകുന്നുണ്ട്. അന്തിമവിധി വരുന്നതുവരെ ആരും കുറ്റക്കാരല്ല. രാജ്യത്തിന്റെ നിയമവ്യവസ്ഥയിൽ പോലും മാറ്റങ്ങൾ വരുത്താൻ സാധ്യതയുള്ളതാണ് പുതിയ ചിത്രമെന്നും സുരേഷ് ഗോപി പറഞ്ഞു.
ബിനീഷ് കോടിയേരിയുടെ കാര്യമായാലും ദിലീപിന്റെ കാര്യമായാലും സ്വപ്നാ സുരേഷിന്റെ കാര്യമായാലും കോടതി പറയണം. അത് വരെ ഞാൻ വിശ്വസിക്കില്ല. കോടതി പറയട്ടെ, അതല്ലേ നമ്മുടെ നാട്ടിൽ ലോ ഓഫ് ദ ലാൻഡ്? അദ്ദേഹം ചോദിച്ചു. മലയാള സിനിമയിലേക്കുള്ള തിരിച്ചുവരവിൽ ഏറെ സന്തോഷമുണ്ടെന്ന് നടി അഭിരാമി പറഞ്ഞു. നടൻ സിദ്ദിഖ്, നടി ദിവ്യാ പിള്ള, സംവിധായകൻ അരുൺ വർമ എന്നിവരും വാർത്താസമ്മേളനത്തിൽ പങ്കെടുത്തു.
സുരേഷ് ഗോപിയെയും ബിജു മേനോനെയും പ്രധാന കഥാപാത്രങ്ങളാക്കി നവാഗതനായ അരുൺ വർമ്മ സംവിധാനം ചെയ്യുന്ന ഏറ്റവും പുതിയ ചിത്രമാണ് ഗരുഡൻ. മിഥുൻ മാനുവൽ തോമസാണ് ചിത്രത്തിന്റെ തിരക്കഥയെഴുതുന്നത്. ചിത്രം നവംബറിൽ തിയേറ്ററുകളിൽ എത്തും.
സിദ്ദിഖ്, ദിലീഷ് പോത്തന്, ജഗദീഷ്, അഭിരാമി, ദിവ്യ പിള്ള, തലൈവാസല് വിജയ്, അര്ജുന് നന്ദകുമാര്, മേജര് രവി, ബാലാജി ശര്മ, സന്തോഷ് കീഴാറ്റൂര്, രഞ്ജിത്ത് കങ്കോല്, ജെയ്സ് ജോസ്, മാളവിക, ജോസുകുട്ടി, ചൈതന്യ പ്രകാശ് എന്നിവരാണ് ഗരുഡനിൽ മറ്റ് പ്രധാന വേഷങ്ങളില് എത്തുന്നത്.
മാജിക് ഫ്രെയിംസിന്റെ ബാനറില് ലിസിറ്റന് സ്റ്റീഫന് ആണ് ചിത്രം നിര്മ്മിക്കുന്നത്. കൊച്ചിയിലും ഹൈദരാബാദിലുമായിട്ടാണ് ഷൂട്ടിംഗ് പൂര്ത്തിയാക്കിയത്. അജയ് ഡേവിഡ് കാച്ചപ്പള്ളിയാണ് ചിത്രത്തിന്റെ ഛായാഗ്രഹണം നിര്വ്വഹിക്കുന്നത്.