സുരേഷ് ഗോപിയെ കേന്ദ്ര കഥാപാത്രമാക്കി നിഥിന് രഞ്ജിപണിക്കര് തിരക്കഥയെഴുതി സംവിധാനം ചെയ്യുന്ന ‘കാവല്’ ചിത്രത്തിലെ പ്രൊമോ ഗാനം പുറത്ത്. നിങ്ങള്ക്കും ആകാം കോടീശ്വരന് പരിപാടിയില് വച്ച് സംഗീതത്തിലൂടെ തന്റെ ശാരീരിക പരിമിതികളെ മറികടക്കുന്ന സന്തോഷിന് അടുത്ത ചിത്രത്തില് പാടാന് അവസരം നല്കാമെന്ന് സുരേഷ് ഗോപി വാക്കു നല്കിയിരുന്നു.
ആ വാക്ക് പാലിച്ചിരിക്കുകയാണ് താരം. ബി കെ ഹരിനാരായണന് എഴുതി രഞ്ജിത്ത് രാജ് സംഗീതം നല്കി സന്തോഷ് ആലപിച്ച ‘കാര്മേഘം മൂടുന്നു…’ എന്നാരംഭിക്കുന്ന ഗാനമാണ് റിലീസായിരിക്കുന്നത്. ചിത്രത്തിന്റെ നിര്മ്മാതാക്കളായ ഗുഡ്വില് എന്റര്ടെയ്ന്മെന്റ്സിന്റെ യുട്യൂബ് ചാനലിലൂടെ പുറത്തിറക്കിയ ഗാനത്തിന് മികച്ച പ്രതികരണമാണ് ലഭിക്കുന്നത്.
നവംബര് 25നാണ് കാവല് തിയേറ്ററുകളില് റിലീസ് ചെയ്യുന്നത്. തമ്പാന് എന്ന കഥാപാത്രമായാണ് സുരേഷ് ഗോപി ചിത്രത്തില് വേഷമിടുന്നത്. ദേശീയ പുരസ്കാര ജേതാവ് നിഖില് എസ് പ്രവീണ് ആണ് ചിത്രത്തിന്റെ ഛായാഗ്രഹണം. ജോസഫ് എന്ന ചിത്രത്തിലൂടെ ശ്രദ്ധേയനായ സംഗീത സംവിധായകന് രഞ്ജിന് രാജ് ആണ് സംഗീതം ഒരുക്കുന്നത്.
ശങ്കര് രാമകൃഷ്ണന്, സുരേഷ് കൃഷ്ണ, പത്മരാജ് രതീഷ്, ശ്രീജിത്ത് രവി, സാദ്ദിഖ്, രാജേഷ് ശര്മ്മ, സന്തോഷ് കീഴാറ്റൂര്, കിച്ചു ടെല്ലസ്, ബിനു പപ്പു, രാജേഷ് ശര്മ്മ, കണ്ണന് രാജന് പി ദേവ്, ചാലി പാല, അരിസ്റ്റോ സുരേഷ്, ഇവാന് അനില്, റേയ്ച്ചല് ഡേവിഡ്, മുത്തുമണി, അഞ്ജലി നായര്, അനിത നായര്, പൗളി വത്സന്, അംബിക മോഹന്, ശാന്ത കുമാരി, ബേബി പാര്വ്വതി തുടങ്ങിയവരും ചിത്രത്തില് വേഷമിടുന്നു.