ലോക്സഭാ തിരഞ്ഞെടുപ്പില് വോട്ട് ചെയ്യാനായി ദുബായില് നിന്നും പറന്നിറങ്ങി സംവിധായകന് എസ്എസ് രാജമൗലി. വോട്ട് ചെയ്ത ശേഷം തന്റെയും ഭാര്യ രമാ രാജമൗലിയുടെയും ചിത്രവും സംവിധായകന് സോഷ്യല് മീഡിയയില് പങ്കിട്ടിട്ടുണ്ട്. തിരഞ്ഞെടുപ്പിന്റെ നാലാം ഘട്ടമാണ് രാജ്യത്ത് നടക്കുന്നത്.
”ദുബായില് നിന്ന് പറന്ന്… എയര്പോര്ട്ടില് നിന്ന് നേരെ പോളിംഗ് ബൂത്തിലേക്ക് ഓടി, അതിനാലാണ് ക്ഷീണിച്ച പോലെ തോന്നുന്നത്, നിങ്ങള് വോട്ട് ചെയ്തോ?”എന്നാണ് എക്സ് പോസ്റ്റില് രാജമൗലി കുറിച്ചിരിക്കുന്നത്. മഷിപുരണ്ട വിരലുകളുടെ ചിത്രമാണ് ഇതിനൊപ്പം രാജമൗലി പങ്കുവച്ചിരിക്കുന്നത്.
ദുബായില് തന്റെ പുതിയ ചിത്രത്തിന്റെ പ്രീ പ്രൊഡക്ഷന് ജോലികളിലാണ് സംവിധായകന്. തിരക്കിനിടയിലും രാജമൗലി വോട്ട് ചെയ്യാനെത്തിയതിനെ പലരും അഭിനന്ദിക്കുന്നുണ്ട്. ഓസ്കര് ജേതാവായ സംഗീതസംവിധായകന് എംഎം കീരവാണി അടക്കം നിരവധി താരങ്ങള് ഇന്ന് വോട്ട് ചെയ്തിട്ടുണ്ട്.
എംഎം കീരവാണി ഹൈദരാബാദിലെ ജൂബിലി ഹില്സിലെ ഒരു പോളിംഗ് സ്റ്റേഷനില് വോട്ട് രേഖപ്പെടുത്തി. അല്ലു അര്ജുനും ഇതേ പോളിംഗ് സ്റ്റേഷനിലെത്തി വോട്ട് ചെയ്തു. നടന് ചിരഞ്ജീവിയും ഭാര്യ സുരേഖയ്ക്കൊപ്പമെത്തി വോട്ട് ചെയ്തു. ജൂനിയര് എന്ടിആര്, ചലച്ചിത്ര നിര്മ്മാതാവ് തേജ എന്നിവരും വോട്ട് രേഖപ്പെടുത്തി.