18 വര്ഷത്തെ ഇടവേളയ്ക്ക് ശേഷം തെലുങ്കില് അഭിനയിക്കുന്നതിന്റെ സന്തോഷം പങ്കുവച്ച് ശോഭന. നാഗ് അശ്വിന്റെ സംവിധാനത്തില് പ്രഭാസ് നായകനാകുന്ന ബ്രഹ്മാണ്ഡ ചിത്രം ‘കല്ക്കി 2898 എഡി’ ചിത്രത്തിലാണ് ശോഭന അഭിനയിക്കുന്നത്. ചിത്രത്തിലെ താരത്തിന്റെ ലുക്ക് പോസ്റ്റര് ആണിപ്പോള് പങ്കുവച്ചിരിക്കുന്നത്.
കാമിയോ റോളിലാണ് ചിത്രത്തില് ശോഭന എത്തുന്നത്. മറിയം എന്ന കഥാപാത്രത്തെയാണ് നടി അവതരിപ്പിക്കുന്നത്. മലയാളത്തില് നിന്നും അന്ന ബെന്നും ചിത്രത്തില് അഭിനയിക്കുന്നുണ്ട്. ദീപിക പദുകോണ് ആണ് ചിത്രത്തില് പ്രഭാസിന്റെ നായികയായെത്തുന്നത്. കലി എന്ന കഥാപാത്രമായാണ് കമല്ഹാസന് ചിത്രത്തിലെത്തുന്നത്.
വില്ലന് ആയാണ് കമല് അഭിനയിക്കുന്നത്. ദുല്ഖര് സല്മാന്, ദിഷ പഠാണി, പശുപതി, അന്നാ ബെന് തുടങ്ങി വന് താരനിരയാണ് ചിത്രത്തില് അണിനിരക്കുന്നത്. സന്തോഷ് നാരായണനാണ് ചിത്രത്തിന്റെ സംഗീതം. ചിത്രം ജൂണ് 27ന് തിയറ്ററുകളിലെത്തും.
ബിസി 3101-ലെ മഹാഭാരതത്തിലെ ഇതിഹാസ സംഭവങ്ങളില് നിന്ന് തുടങ്ങി 2898 എഡി വരെ സംഭവിക്കുന്ന സഹസ്രാബ്ദങ്ങള് നീണ്ടുനില്ക്കുന്ന ഒരു യാത്രയാണ് കല്ക്കിയുടെ ഇതിവൃത്തം. വൈജയന്തി മൂവീസിന്റെ ബാനറില് സി. അശ്വനി ദത്ത് ആണ് ചിത്രം നിര്മിക്കുന്നത്. സന്തോഷ് നാരായണന് ആണ് ചിത്രത്തിന്റെ ഗാനങ്ങള് ഒരുക്കിയിരിക്കുന്നത്.