സാമന്ത നായികയായി എത്തിയ ശാകുന്തളം വന് പ്രതീക്ഷകളോടെയാണ് തിയേറ്ററുകളിലെത്തിയത്. എന്നാല് 50-60 കോടി ബജറ്റില് തിയേറ്ററുകളിലെത്തിയ ചിത്രം വലിയ തകര്ച്ചയാണ് നേരിട്ടതെന്ന റിപ്പോര്ട്ടുകളാണ് തെലുങ്ക് മാധ്യമങ്ങളില് ഇപ്പോള് നിറയുന്നത്.
ഏപ്രില് 14 ന് തിയറ്ററുകളിലെത്തിയ ചിത്രം നേടിയ ലൈഫ് ടൈം കളക്ഷന് വെറും 7 കോടി മാത്രമാണെന്ന് ന്യൂസ് 18 റിപ്പോര്ട്ട് ചെയ്യുന്നു. ഗ്രേറ്റ് ആന്ധ്രയുടെ റിപ്പോര്ട്ട് പ്രകാരം നിര്മ്മാതാവ് ദില് രാജുവിന് ചിത്രം ഉണ്ടാക്കിയ നഷ്ടം 22 കോടിയുടേതാണ്.
ദസറ, ബലഗാം, എഫ് 3 ഉള്പ്പെടെയുള്ള വിജയ ചിത്രങ്ങളുടെ നിര്മ്മാതാവാണ് അദ്ദേഹം. റിലീസിന് മുന്പ് ഒടിടി റൈറ്റ്സ് വഴി ചിത്രം വലിയ തുക നേടിയെന്ന് നേരത്തെ റിപ്പോര്ട്ടുകള് എത്തിയിരുന്നു. സാറ്റലൈറ്റ് റൈറ്റിലും വലിയ തുക നേടാന് ദില് രാജു ശ്രമിച്ചെങ്കിലും വിജയകരമായി കരാറിലെത്താന് കഴിഞ്ഞില്ലെന്നും.
ഗുണശേഖര് സംവിധാനം ചെയ്ത ചിത്രം മിത്തോളജിക്കല് ഡ്രാമ വിഭാഗത്തില് പെടുന്ന ഒന്നാണ്. മഹാഭാരതത്തിലെ ഉപകഥയെ ആസ്പദമാക്കി കാളിദാസന് രചിച്ച പ്രശസ്ത നാടകം അഭിജ്ഞാന ശാകുന്തളത്തെ അധികരിച്ച് സംവിധായകന് തന്നെയാണ് തിരക്കഥ ഒരുക്കിയത്. തെലുങ്കിന് പുറമെ ഹിന്ദി, തമിഴ്, മലയാളം, കന്നഡ ഭാഷകളിലും ചിത്രം ഒരേ സമയം തിയറ്ററുകളില് എത്തിയിരുന്നു. എന്നാല് ആദ്യ ദിനം മുതല് മോശം മൗത്ത് പബ്ലിസിറ്റിയാണ് ചിത്രത്തിന് ലഭിച്ചത്.