ലോക്സഭാ തിരഞ്ഞെടുപ്പില്‍ മത്സരിക്കാന്‍ ഇല്ലെന്ന് കന്നഡ സൂപ്പര്‍ താരം ശിവ രാജ്കുമാര്‍. കോണ്‍ഗ്രസ് സ്ഥാനാര്‍ഥിയാക്കാമെന്ന കര്‍ണാടക ഉപമുഖ്യമന്ത്രി ഡി.കെ ശിവകുമാറിന്റെ വാഗ്ദാനം നിരസിച്ചിരിക്കുകയാണ് ശിവ രാജ്കുമാര്‍.
ബെംഗളൂരുവില്‍ നടക്കുന്ന ഇഡിഗ സമുദായത്തിന്റെ സമ്മേളനത്തിലാണ് ഇഷ്ടമുള്ള മണ്ഡലത്തില്‍ സ്ഥാനാര്‍ഥിയായി മത്സരിക്കാമെന്ന നിര്‍ദേശം ശിവ രാജ്കുമാറിന് മുന്നില്‍ ശിവകുമാര്‍ വച്ചത്. എന്നാല്‍ സിനിമയ്ക്ക് പുറത്ത് മറ്റൊന്നിനോടും താല്‍പര്യമില്ലെന്ന് പറഞ്ഞ ശിവ രാജ്കുമാര്‍ തിരഞ്ഞെടുപ്പില്‍ മത്സരിക്കാനില്ലെന്നും വ്യക്തമാക്കി.
”ലോകസഭാ തിരഞ്ഞെടുപ്പില്‍ മത്സരിക്കാന്‍ തയ്യാറാകണം എന്നാണ് ഞാന്‍ ശിവ രാജ്കുമാറിനോട് പറയുന്നത്. സിനിമയില്‍ എപ്പോള്‍ വേണമെങ്കിലും അഭിനയിക്കാം. എന്നാല്‍ ലോകസഭാ അംഗമെന്ന ബഹുമതി അങ്ങനെയല്ല. വീട്ടുപടിക്കല്‍ വന്ന നില്‍ക്കുന്ന ഭാഗ്യത്തെ കൈവിടരുത്” എന്നായിരുന്നു ശിവകുമാര്‍ പറഞ്ഞത്.
”നിങ്ങള്‍ക്ക് വിനോദം നല്‍കുക എന്നതാണ് എന്റെ ദൗത്യം. എനിക്ക് അഭിനയമാണ് താല്‍പര്യം. രാഷ്ട്രീയം നന്നായി കൈകാര്യം ചെയ്യാന്‍ സാധിക്കുന്ന ഒരുപാട് ആളുകള്‍ ഇവിടെയുണ്ട്” എന്നാണ് ശിവ രാജ്കുമാര്‍ മറുപടി നല്‍കിയത്.
അതേസമയം, തന്റെ ഭാര്യയും മുന്‍ മുഖ്യമന്ത്രി ബംഗാരപ്പയുടെ മകളുമായ ഗീത ശിവ രാജ്കുമാര്‍ തിരഞ്ഞെടുപ്പില്‍ മത്സരിക്കാന്‍ തീരുമാനിച്ചാല്‍ പിന്തുണയ്ക്കുമെന്നും ശിവ രാജ്കുമാര്‍ തന്റെ മറുപടിയില്‍ വ്യക്തമാക്കി.