ഷെബി ചൗഘട്ട് ചിത്രം ‘കാക്കിപ്പട’യ്ക്ക് ദുബായ് ഇന്റര്നാഷണല് ഫിലിം കാര്ണിവല് പുരസ്കാരം. ഇന്റര്നാഷണല് നറേറ്റീവ് ഫീച്ചര് വിഭാഗത്തില് സംവിധായകന് ഷെബി ചൗഘട്ടിനാണ് അവാര്ഡ്. 2022 ഡിസംബറിലാണ് കാക്കിപ്പട പുറത്തിറങ്ങിയത്. മെല്ബണില് നടക്കുന്ന ഐഎഫ്എഫ്എം 2023ലേക്ക് തിരഞ്ഞെടുത്തിട്ടുണ്ട്.
ഹൈദരാബാദില് നടന്ന ഒരു യഥാര്ത്ഥ സംഭവത്തില് നിന്ന് പ്രചോദനമുള്ക്കൊണ്ട് നിര്മ്മിച്ച കാക്കിപ്പട പ്രേക്ഷകര്ക്കിടയിലും നിരൂപകര്ക്കിടയിലും ഏറെ ചര്ച്ച ചെയ്യപ്പെട്ട ചിത്രമായിരുന്നു. സംവിധായകന് ഷെബി ചൗഘട്ട് തന്നെയാണ് കാക്കിപ്പടയുടെ രചനയും നിര്വഹിച്ചിരിക്കുന്നത്.
തിയേറ്ററിലും ഒടിടിയിലും റിലീസ് ചെയ്ത സമയത്ത് ഏറെ പ്രേക്ഷക ശ്രദ്ധ പിടിച്ചു പറ്റിയ ചിത്രമായിരുന്നു കാക്കിപ്പട. കുട്ടികള്ക്കെതിരായ ലൈംഗിക ആക്രമണങ്ങള് ഉണ്ടായപ്പോള് ഈ സിനിമ സോഷ്യല് മീഡിയയില് വലിയ തോതില് ചര്ച്ച ചെയ്യപ്പെട്ടിരുന്നു. ചിത്രത്തിന്റെ രണ്ടാം ഭാഗം എത്തുമെന്നും പ്രഖ്യാപിച്ചിരുന്നു.
സാമൂഹ്യപ്രശ്നങ്ങളില് ആഴ്ന്നിറങ്ങുന്ന ജനപ്രിയ പ്രമേയമാണ് രണ്ടാം വരവിലും കാക്കിപ്പടയുടെ പ്രമേയമാവുക എന്ന് സംവിധായകന് വ്യക്തമാക്കിയിരുന്നു. എസ്.വി പ്രൊഡക്ഷന്സിന്റെ ബാനറില് ഷെജി വലിയകത്താണ് ഈ ചിത്രം നിര്മ്മിച്ചത്. പ്രശാന്ത് കൃഷ്ണ ഛായാഗ്രഹണവും ബാബു രത്നം എഡിറ്റിംഗും നിര്വ്വഹിച്ച ചിത്രത്തിന്റെ സംഗീതം ജാസി ഗിഫ്റ്റായിരുന്നു.
നിരഞ്ജ് മണിയന്പിള്ള രാജു, സുജിത്ത് ശങ്കര്, അപ്പാനി ശരത്ത്, ചന്തുനാഥ്, ആരാധ്യാ ആന്, മണികണ്ഠന് ആചാരി, ജയിംസ് ഏല്യാ, സജിമോന് പാറായില്, വിനോദ് സാക്, സിനോജ് വര്ഗീസ്, കുട്ടി അഖില്, സൂര്യാ അനില്, പ്രദീപ്, ദീപു കരുണാകരന്, ഷിബുലാബാന്, മാലാ പാര്വ്വതി എന്നിവരും കൂടാതെ നിരവധി പുതുമുഖങ്ങളും ചിത്രത്തില് വേഷമിട്ടിരുന്നു.