‘പഠാൻ’, ‘ജവാൻ’ എന്നീ രണ്ട് സിനിമകളിലൂടെ ഈ വർഷം ബോക്സ്ഓഫീസിൽ ഏറ്റവും കൂടുതൽ നേട്ടമുണ്ടാക്കിയ താരമാണ് ഷാരൂഖ് ഖാൻ. രാജ്കുമാർ ഹിരാനി സംവിധാനം ചെയ്യുന്ന ഏറ്റവും പുതിയ ചിത്രമായ ‘ഡങ്കി’യിലൂടെ ഷാരൂഖ് ഖാൻ ഈ വർഷം ഹാട്രിക് വിജയം സ്വന്തമാക്കുമോ എന്നായിരുന്നു പ്രേക്ഷകർ ഉറ്റുനോക്കിയിരുന്നത്.
ഡങ്കിയുടെ ആദ്യ ഷോയ്ക്ക് ശേഷം മികച്ച പ്രേക്ഷക പ്രതികരണമാണ് ചിത്രത്തിന് ലഭിച്ചുകൊണ്ടിരിക്കുന്നത്. ഷാരൂഖിന്റെ മികച്ച പ്രകടനവും തമാശകളും കൊണ്ട് പ്രേക്ഷകന്റെ മനസുനിറക്കുന്ന സിനിമയാണ് ഡങ്കി എന്നാണ് പ്രേക്ഷകർ പറയുന്നത്. ജവാൻ, പഠാൻ സിനിമകൾ പോലെ ഒരു മാസ് സിനിമ പ്രതീക്ഷിച്ച് ഡങ്കിക്ക് പോവരുതെന്നാണ് ചില പ്രേക്ഷകർ പറയുന്നത്. ദേശസ്നേഹവും, വികാരങ്ങളും തമാശയും നിറഞ്ഞ മികച്ച ചലച്ചിത്രാനുഭവമാണ് ഡങ്കി എന്നും പ്രേക്ഷകർ അഭിപ്രായപ്പെടുന്നു.
ഇന്ത്യൻ സിനിമയിൽ ആമുഖങ്ങൾ ആവശ്യമില്ലാത്ത സംവിധായകനാണ് രാജ്കുമാർ ഹിരാനി. ‘മുന്ന ഭായ് എംബിബിഎസ്’, ‘3 ഇഡിയറ്റ്സ്’,’പികെ’, എന്നീ മൂന്ന് ചിത്രങ്ങൾ മാത്രം മതി ഹിരാനിയിലെ പ്രതിഭയെ തിരിച്ചറിയാൻ.
കെജിഎഫിന് ശേഷം പ്രശാന്ത് നീൽ സംവിധാനം ചെയ്യുന്ന ഏറ്റവും പുതിയ ചിത്രമായ ‘സലാർ’ നാളെയാണ് തിയേറ്ററുകളിൽ എത്തുന്നത്. അതോടുകൂടി ഡങ്കിയുമായുള്ള മത്സരം കനക്കും. ഡങ്കിയെ മറികടന്ന് സലാർ 1000 കോടി ക്ലബ്ബിൽ കയറുമെന്നാണ് പ്രേക്ഷകർ പറയുന്നത്.