നടി ശാന്തികൃഷ്ണയുടെ പിതാവ് ആര്. കൃഷ്ണന് അന്തരിച്ചു. ഇന്ന് രാവിലെ 8.45-ന് ബംഗ്ലൂരുവിലെ ആശുപത്രിയില് വെച്ചായിരുന്നു അന്ത്യം. 92 വയസായിരുന്നു. കിഡ്നി സംബന്ധമായ പ്രശ്നങ്ങളെ തുടര്ന്ന് ചികിത്സയിലായിരുന്നു അദ്ദേഹം.
കിഡ്നി സംബന്ധമായി ചില പ്രശ്നങ്ങള് ഉണ്ടായതിനെ തുടര്ന്നാണ് ആശുപത്രിയില് പ്രവേശിപ്പിച്ചത്. പിന്നീട് കോവിഡ് ബാധിക്കുകയായിരുന്നു. ലക്ഷണങ്ങളൊന്നും പ്രകടിപ്പിച്ചില്ല, എന്നാല് ആരോഗ്യനില വഷളാവുകയായിരുന്നു. ഇന്ന് രാവിലെ അച്ഛന് പോയെന്നും ശാന്തികൃഷ്ണ മനോരമ ഓണ്ലൈനോടു വ്യക്തമാക്കി.
തമിഴ് സംവിധായകന് സുരേഷ് കൃഷ്ണ ശാന്തിയുടെ സഹോദരനാണ്. ബംഗ്ലൂരുവില് കുടുംബത്തോടൊപ്പമാണ് താമസം. കോവിഡ് പ്രോട്ടോകോള് അനുസരിച്ചായിരിക്കും സംസ്കാരം.
തെന്നിന്ത്യന് സിനിമാരംഗത്ത് ശ്രദ്ധേയായ താരമാണ് ശാന്തി കൃഷ്ണ. 1981-ല് നിദ്ര എന്ന സിനിമയിലാണ് ആദ്യമായി വേഷമിട്ടത്. മലയാളത്തില് ശ്രദ്ധേയയായ താരം തമിഴ്, തെലുങ്ക്, കന്നഡ ചിത്രങ്ങളിലും വേഷമിട്ടിട്ടുണ്ട്. ഒരു രാത്രി ഒരു പകല്, ശ്യാമരാഗം എന്നിവയാണ് ചിത്രീകരണം നടക്കുന്ന ചിത്രങ്ങള്.