ഷെയ്ന് നിഗം നായകനായെത്തുന്ന ചിത്രം വലിയ പെരുന്നാള് നാളെ തിയേറ്ററുകളിലെത്തും. ചിത്രത്തില് തകര്പ്പന് ലുക്കിയാണ് ഷെയ്ന് എത്തുന്നത്. ചിത്രത്തിലെ ഷെയ്നിന്റെ കിടിലന് നൃത്തച്ചുവടുകള് ഇതിനോടകം സോഷ്യല് മീഡിയയില് ശ്രദ്ധ നേടിയിട്ടുണ്ട്. ഇപ്പോഴിതാ ഡാന്സ് ചെയ്യുന്ന മറ്റൊരു വീഡിയോ സോഷ്യല് മീഡിയയില് പങ്കുവെച്ച് ചിത്രത്തിന്റെ വരവ് അറിയിച്ചിരിക്കുകയാണ് ഷെയ്ന്. മികച്ച സ്വീകാര്യതയാണ് വീഡിയോയ്ക്ക് ലഭിച്ചു കൊണ്ടിരിക്കുന്നത്.
തന്റെ ഏറ്റവും മികച്ച സിനിമയായിരിക്കും വലിയ പെരുന്നാള് എന്നാണ് ഷെയ്ന് ചിത്രത്തെ കുറിച്ച് പറയുന്നത്. നവാഗതനായ ഡിമല് ഡെന്നിസ് തിരക്കഥയെഴുതി സംവിധാനം ചെയ്യുന്ന ചിത്രത്തില് ഡാന്സറിന്റെ വേഷത്തിലാണ് ഷെയ്ന് എത്തുന്നത്. ഫോര്ട്ട് കൊച്ചി- മട്ടാഞ്ചേരി ഭാഗത്തു ജീവിക്കുന്ന ഒരു പിടി ആളുകളുടേയും അവരുടെ ഇടയിലെ സങ്കീര്ണമായ ബന്ധങ്ങളുടെയും അവരുടെ ദൈനം ദിന ജീവിതത്തിലെ അപ്രതീക്ഷിതമായ ചില സംഭവവികാസങ്ങളുടേയും കഥയാണ് ഈ ചിത്രം പറയുന്നത്. അന്തരിച്ചു പോയ പ്രശസ്ത നടന് ക്യാപ്റ്റന് രാജുവിന്റെ അവസാനത്തെ ചിത്രമെന്ന പ്രത്യേകത കൂടി ഈ ചിത്രത്തിനുണ്ട്.
മാജിക് മൗണ്ടെയിന് സിനിമാസിന്റെ ബാനറില് അന്വര് റഷീദും മോനിഷ രാജീവും ചേര്ന്നാണ് ചിത്രം നിര്മ്മിക്കുന്നത്. “എ ഫെസ്റ്റിവല് ഓഫ് സാക്രിഫൈസ്” എന്ന ടാഗോടെയാണ് ചിത്രം എത്തുന്നത്. ഹിമിക ബോസാണ് ചിത്രത്തില് നായികാ കഥാപാത്രത്തെ അവതരിപ്പിക്കുന്നത്. ജോജു ജോര്ജ്, സൗബിന് ഷാഹിര്, വിനായകന് എന്നിവരും ചിത്രത്തിലുണ്ട്. ഛായാഗ്രഹണം സുരേഷ് രാജന്.