സുരേഷ് ഗോപിയെ നായകനാക്കി 2006 ഇല് ഷാജി കൈലാസ് ഒരുക്കിയ ക്രൈം ത്രില്ലര് ചിത്രമാണ് ചിന്താമണി കൊലക്കേസ്. അതിന് ശേഷം ഇപ്പോഴിതാ വീണ്ടുമൊരു ത്രില്ലര് ഒരുക്കാനുള്ള തയ്യാറെടുപ്പുകളിലാണ് ഷാജി കൈലാസ്. പൃഥ്വിരാജ്- ആസിഫ് അലി ടീമിന്റെ കാപ്പക്ക് ശേഷം ഷാജി കൈലാസ് ഒരുക്കാന് പോകുന്ന ചിത്രമാകും ത്രില്ലര് വിഭാഗത്തിലുള്ള പിങ്ക് പോലീസ് എന്നാണ് സൂചന.
സ്ത്രീ കഥാപാത്രങ്ങള് നിര്ണ്ണായക വേഷങ്ങള് ചെയ്യുന്ന ഈ ചിത്രത്തിലെ കേന്ദ്ര കഥാപാത്രത്തെ അവതരിപ്പിക്കാന് പരിഗണിക്കുന്നത് നയന് താര, തെന്നിന്ത്യന് സൂപ്പര് ഹീറോയിന് സാമന്ത, ബോളിവുഡ് താരവും മലയാളിയുമായ വിദ്യ ബാലന് എന്നിവരെയാണ്.
ജി ആര് ഇന്ദുഗോപന് തിരക്കഥ, സംഭാഷണങ്ങള് എന്നിവയൊരുക്കുന്ന ഈ ചിത്രം നിര്മ്മിക്കാന് പോകുന്നത് തിയേറ്റര് ഓഫ് ഡ്രീംസിന്റെ ബാനറില് ഡോള്വിന് കുര്യാക്കോസ്, ജിനു വി എബ്രഹാം എന്നിവര് ചേര്ന്നാണ്. ഈ ടീം തന്നെ നിര്മ്മിക്കുന്ന ചിത്രമാണ് കാപ്പ. ആ ചിത്രം രചിച്ചിരിക്കുന്നതും ഇന്ദുഗോപന് തന്നെയാണ്. പിങ്ക് പോലീസെന്ന സിനിമയുടെ ചിത്രീകരണം ഈ വര്ഷം അവസാനത്തോടെയുണ്ടാകുമെന്നാണ് ഇപ്പോള് ലഭിക്കുന്ന വിവരങ്ങള് സൂചിപ്പിക്കുന്നത്.
ശരവണന് ക്യാമറ ചലിപ്പിക്കാന് പോകുന്ന ഈ ചിത്രത്തെ കുറിച്ചുള്ള കൂടുതല് വിവരങ്ങള് വൈകാതെ പുറത്തു വിടും. ഇത് കൂടാതെ ടോവിനോ തോമസ് നായകനാവുന്ന അന്വേഷിപ്പിന് കണ്ടെത്തും, ഡിനോ ഡെന്നിസ് ഒരുക്കുന്ന മമ്മൂട്ടി ചിത്രമെന്നിവയും തിയേറ്റര് ഓഫ് ഡ്രീംസ് നിര്മ്മിക്കും.