മുന്‍ ഐഎസ്ആര്‍ഒ ശാസ്ത്രജ്ഞന്‍ നമ്പി നാരായണന്റെ ബയോപിക് ആയി ആര്‍. മാധവന്‍ ഒരുക്കുന്ന ചിത്രമാണ്. “റോക്കട്രി: ദ നമ്പി ഇഫക്ട്”. ചിത്രത്തില്‍ മാധ്യമപ്രവര്‍ത്തകന്റെ വേഷത്തില്‍ ബോളിവുഡ് കിങ് ഷാരൂഖ് ഖാന്‍ എത്തുമെന്ന് റിപ്പോര്‍ട്ടുകള്‍. നമ്പി നാരായണന്റെ ഫ്‌ളാഷ്ബാക്ക് പറയുന്ന മാധ്യമപ്രവര്‍ത്തകനായാകും ഷാരൂഖ് വേഷമിടുക.
തന്റെ ഭാഗങ്ങള്‍ ഷാരൂഖ് അഭിനയിച്ചു കഴിഞ്ഞതായാണ് റിപ്പോര്‍ട്ടുകള്‍. തമിഴ്, ഹിന്ദി, ഇംഗ്ലീഷ് എന്നീ ഭാഷകളിലായാണ് ചിത്രം ഒരുക്കുന്നത്. തമിഴ് പതിപ്പില്‍ മാധ്യമപ്രവര്‍ത്തകന്റെ ഭാഗം നടന്‍ സൂര്യ അവതരിപ്പിക്കുമെന്നും റിപ്പോര്‍ട്ടുകളുണ്ട്. നമ്പി നാരായണന്‍ ആകാന്‍ മാധവന്‍ ശാരീരിക പരിവര്‍ത്തനങ്ങള്‍ നടത്തിയതായും റിപ്പോര്‍ട്ടുകളുണ്ട്.
1994 നവംബര്‍ 30ന് ചാരവൃത്തി ആരോപിച്ച് നമ്പി നാരാണനെ അറസ്റ്റ് ചെയ്യുകയും അന്‍പതു ദിവസം ജയിലില്‍ അടക്കുകയുമുണ്ടായി. ഐഎസ്ആര്‍ഒ വികസിപ്പിച്ചുകൊണ്ടിരുന്ന ക്രയോജനിക് എഞ്ചിന്‍ സാങ്കേതികവിദ്യയെ ചുറ്റിപ്പറ്റിയായിരുന്നു ചാരവൃത്തി ആരോപണം. പിന്നീട് നിരപരാധിയാണന്നു മനസ്സിലാക്കി 1998ല്‍ സുപ്രീം കോടതി നമ്പി നാരായണനെ കുറ്റവിമുക്തനാക്കി. ഈ കേസിനെ അടിസ്ഥാനമാക്കിയാണ് സിനിമ ഒരുങ്ങുന്നത്.