തമിഴ്നാട് മുഖ്യമന്ത്രിയും നടനുമായ വിജയ്യുടെയും ഭാര്യ സംഗീതയുടെയും വേർപിരിയൽ വാർത്ത വലിയ ചർച്ചയായിരുന്നു. വിജയ്ക്ക് മറ്റൊരു ബന്ധമുണ്ടെന്നും അത് തമിഴിലെ പ്രമുഖ നടിയാണെന്ന തരത്തിലുള്ള അഭ്യൂഹങ്ങളും പുറത്ത് വന്നിരുന്നു. അതിനിടയിലായിരുന്നു സംഗീത വിവാഹമോചനക്കേസ് നൽകിയത്. ഇപ്പോഴിതാ സംഗീതയും വിജയ്യും വീണ്ടും ഒന്നിക്കുന്നുവെന്ന റിപ്പോർട്ടുകളാണ് പുറത്ത് വരുന്നത്.
വിജയ്യും ഭാര്യ സംഗീതയും തമ്മിലുള്ള പിണക്കങ്ങൾ മാറി ഇരുവരും വീണ്ടും ഒന്നിച്ചു താമസിക്കാൻ ആരംഭിച്ചതായാണ് തമിഴ് മാധ്യമങ്ങൾ റിപ്പോർട്ട് ചെയ്യുന്നത്. വിജയ്യുടെ അമ്മ ശോഭ ചന്ദ്രശേഖറിന്റെയും അടുത്ത ബന്ധുക്കളുടെയും മധ്യസ്ഥതയിലാണ് ഒത്തുതീർപ്പുണ്ടായത്. ജൂൺ 15-ന് കോടതിയിൽ വരാനിരുന്ന വിവാഹമോചന ഹർജി വേണ്ടെന്നുവെക്കാൻ ഇരുവരും തീരുമാനിച്ചുവെന്നാണ് പുറത്ത് വരുന്ന വിവരം.
ലണ്ടനിലായിരുന്ന സംഗീത ചെന്നൈയിൽ തിരിച്ചെത്തുകയും നീലാംകരെയിലെ വീട്ടിൽ വിജയ്യോടൊപ്പം താമസം ആരംഭിക്കുകയും ചെയ്തുവെന്നും വിവരമുണ്ട്. എന്നാൽ വാർത്തകൾ ഔദ്യോഗികമായി സ്ഥിരീകരിച്ചിട്ടില്ലെങ്കിലും പ്രിയ താരം കുടുംബത്തോടൊപ്പം സന്തോഷത്തോടെ ഇരിക്കുന്നതിൻ്റെ ആശ്വാസത്തിലാണ് ആരാധകർ.