മികച്ച വിജയം നേടി മൂന്നാം ദിന യാത്ര തുടങ്ങിയിരിക്കുകയാണ് പത്താന്. ഇന്ത്യക്കകത്തും പുറത്തുമായി സിനിമ കാണാന് വന്തിരക്കാണ് അനുഭവപ്പെടുന്നത്. ആദ്യ ദിനം ആഗോള തലത്തില് ചിത്രം നേടിയത് 97.17 കോടി രൂപയാണ്. രണ്ടാം ദിനത്തില് 75 കോടിക്കടുത്ത് ലഭിച്ചതായും റിപ്പോര്ട്ടുണ്ട്.
ബോക്സ് ഓഫീസില് ഇടം നേടാന് ഷാരൂഖ് ഖാന് മാത്രമല്ല സല്മാന് ഖാന്റെ വരവും സഹായിച്ചിട്ടുണ്ടെന്നാണ്് ട്രേഡ് അനലിസ്റ്റ് ശ്രീധര് പിള്ള ട്വീറ്റ് ചെയ്യുന്നത്. സല്മാന്റെ അതിഥി വേഷം മികച്ച ഇമ്പാക്ട് ഉണ്ടാക്കിയിട്ടുണ്ട് എന്നും സിനിമയിലെ ഷാരൂഖ്-സല്മാന് ബന്ധം സിനിമയുടെ ക്ലൈമാക്സിനെ മനോഹരമാക്കിയെന്നാണ് പ്രേക്ഷകര് പറയുന്നത്.
സിനിമയ്ക്ക് തെന്നിന്ത്യയിലും വന് വരവേല്പ്പാണ് ലഭിച്ചത്. ആദ്യ ദിനം തമിഴ്നാ്ട്ടില് നിന്ന് നേടിയത് നാല് കോടി രൂപയാണ്. കേരളത്തില് ആദ്യ ദിവസം 1.91 കോടി ഗ്രോസ് കളക്ഷന് നേടിയെന്നാണ് സിനിമാ ട്രാക്കേഴ്സായ ഫോറം കേരളം ട്വീറ്റ് ചെയ്യുന്നത്. ഹിന്ദി പതിപ്പ് മാത്രം 52 കോടിയലിധികം കളക്ഷന് സ്വന്തമാക്കിയതായി ചില ട്രേഡ് അനലിസ്റ്റുകള് ട്വീറ്റ് ചെയ്യുന്നുണ്ട്.
2018ല് റിലീസ് ചെയ്ത സീറോ എന്ന ചിത്രത്തിന് ശേഷം ആദ്യമായാണ് ഒരു ഷാറൂഖ് ചിത്രം ബോളിവുഡില് റിലീസ് ചെയ്യപ്പെടുന്നത്. തുടര് പരാജയങ്ങള്ക്ക് പിന്നാലെ, വലിയ ഇടവേളയാണ് താരമെടുത്തത്. സിദ്ധാര്ത്ഥ് ആനന്ദ് സംവിധാനം ചെയ്ത പത്താനില് ദീപിക പദുക്കോണ്, ജോണ് അബ്രഹാം എന്നിവരും പ്രധാന വേഷത്തിലുണ്ട്. ഷാരൂഖിനൊപ്പം ഇരുവര്ക്കും വലിയ കൈയ്യടിയാണ് ലഭിച്ചുകൊണ്ടിരിക്കുന്നത്.