ബാഹുബലിയ്ക്ക് ശേഷം പ്രഭാസിന്റെ “സഹോ” യ്ക്കായുള്ള കാത്തിരിപ്പിലാണ് ആരാധകര്‍. ഹിന്ദി, തമിഴ്, തെലുങ്ക്, ഭാഷകളില്‍ ഇറങ്ങുന്ന ബിഗ് ബജറ്റ് ചിത്രത്തില്‍ ശ്രദ്ധ കപൂറാണ് നായിക. ശ്രദ്ധയുടെ പിറന്നാള്‍ ദിനമാണ്. അതിനാല്‍ തന്നെ ശ്രദ്ധയ്ക്ക് വ്യത്യസ്തമായ ഒരു പിറന്നാള്‍ സമ്മാനം നല്‍കി രംഗത്ത് വന്നിരിക്കുകയാണ് സഹോ ടീം. ചിത്രത്തിലെ ആക്ഷന്‍ രംഗങ്ങള്‍ ഉള്‍ക്കൊള്ളിച്ചിട്ടുള്ള മേക്കിംഗ് വീഡിയോ ആണ് ശ്രദ്ധ കപൂറിനുള്ള ജന്മദിനാശംസകളോടെ ചിത്രത്തിന്റെ നിര്‍മ്മാതാക്കളായ യുവി ക്രിയേഷന്‍ പുറത്തു വിട്ടിരിക്കുന്നത്.
വന്‍സ്വീകാര്യതയാണ് മേക്കിംഗ് വീഡിയോയ്ക്ക് ലഭിച്ചു കൊണ്ടിരിക്കുന്നത്. പുറത്തിറങ്ങി മണിക്കൂറുകള്‍ മാത്രം പിന്നിടുമ്പോള്‍ വീഡിയോയ്ക്ക് എട്ടു ലക്ഷത്തിനടുത്ത് കാഴ്ച്ചക്കാരായി. ചിത്രത്തിന്റെ ആക്ഷന്‍ രംഗങ്ങള്‍ക്ക് മാത്രം 90 കോടി രൂപയാണ് ചെലവെന്നാണ് റിപ്പോര്‍ട്ട്. ഹോളിവുഡ് ആക്ഷന്‍ സംവിധായകന്‍ കെന്നി ബേറ്റസാണ് ആക്ഷന്‍ രംഗങ്ങള്‍ കൈകാര്യം ചെയ്യുന്നത്. ട്രാന്‍സ്ഫോര്‍മേഴ്സ്, റഷ് അവര്‍ തുടങ്ങിയ സിനിമകളുടെ ആക്ഷന്‍ സംവിധായകനാണ് ഇദ്ദേഹം.
സുജീത് ആണ് ചിത്രം സംവിധാനം ചെയ്യുന്നത്. ടി സീരീസും, യു.വി. ക്രിയേഷന്‍സും ഒരുമിച്ചാണ് ചിത്രത്തിന്റെ നിര്‍മ്മാണം നിര്‍വഹിക്കുന്നത്. ജാക്കി ഷ്റോഫ്, മന്ദിര ബേദി, നീല്‍ നൈറ്റിന് മുകേഷ്, ചങ്കി പാണ്ഡെ, അരുണ്‍ വിജയ് മുരളി ശര്‍മ്മ എന്നിവരടങ്ങിയ വമ്പന്‍ താരനിരയാണ് ചിത്രത്തിലുള്ളത്. ശങ്കര്‍-എഹ്‌സാന്‍-ലോയ് ത്രയങ്ങള്‍ സംഗീതസംവിധാനം നിര്‍വഹിക്കുന്ന ചിത്രത്തിലെ ഗാനരചന നിര്‍വഹിച്ചിരിക്കുന്നത് അമിതാബ് ഭട്ടാചാര്യയാണ്. ഓഗസ്റ്റ് 15നു ചിത്രം തീയറ്ററുകളിലെത്തുമെന്നാണ് കരുതുന്നത്.