‘റൈഫിള് ക്ലബ്ബ്’ ചിത്രത്തിലെ ബോളിവുഡ് സംവിധായകന് അനുരാഗ് കശ്യപിന്റെ അഭിനയത്തെ പ്രശംസിച്ച് സോഷ്യല് മീഡിയ. ദയാനന്ദ് ബാരെ എന്ന ശക്തമായ കഥാപാത്രത്തെയാണ് അനുരാഗ് കശ്യപ് ചിത്രത്തില് അവതരിപ്പിച്ചത്. അനുരാഗിനെ പ്രശംസിച്ചു കൊണ്ടുള്ള കുറിപ്പാണ് ശ്രദ്ധ നേടുന്നത്. ഇത് സംവിധായകന് തന്റെ സോഷ്യല് മീഡിയ പേജില് പങ്കുവച്ചിട്ടുണ്ട്.
”ശാലിനി ഉണ്ണികൃഷ്ണന്, ‘മനസിലായോ’യിലെ ദീപ്തി സുരേഷ്, ബേബി ജോണിലെ പാട്ട്, ഇത് എല്ലാം ചേര്ത്തു വെച്ചാലും അതിനേക്കാള് നന്നായി അനുരാഗ് കശ്യപ് മലയാളം സംസാരിച്ചു. മിസ്റ്റര് കശ്യപ് നിങ്ങള് ഇത് വായിക്കുന്നുണ്ടെങ്കില്, ദയവായി തെന്നിന്ത്യന് സിനിമ വിട്ടുപോകരുത്” എന്നാണ് ഒരാള് കുറിച്ചിരിക്കുന്നത്.
അതേസമയം, റൈഫിള് ക്ലബ്ബിന് മികച്ച പ്രതികരണമാണ് തിയേറ്ററുകളില് നിന്നും ലഭിക്കുന്നത്. ദിലീഷ് പോത്തന്, വാണി വിശ്വനാഥ്, ഹനുമാന് കൈന്ഡ്, വിജയരാഘവന് എന്നിവരാണ് ചിത്രത്തിലെ മറ്റ് പ്രധാന താരങ്ങള്. ഒപിഎം സിനിമാസിന്റെ ബാനറില് ആഷിഖ് അബു, വിന്സന്റ് വടക്കന്, വിശാല് വിന്സന്റ് ടോണി എന്നിവര് ചേര്ന്നാണ് ചിത്രം നിര്മിച്ചിരിക്കുന്നത്.
സിനിമയുടെ ഛായാഗ്രഹണവും ആഷിഖ് അബു തന്നെയാണ് നിര്വഹിക്കുന്നത്. റൈഫിള് ക്ലബ്ബിന്റെ തിരക്കഥയും സംഭാഷണവും ഒരുക്കിയിരിക്കുന്നത് ദിലീഷ് കരുണാകരന്, ശ്യാം പുഷ്കരന്, സുഹാസ് എന്നിവര് ചേര്ന്നാണ്. ‘മായാനദി’ക്ക് ശേഷം ആഷിഖ് അബു, ശ്യാം പുഷ്കരന്, ദിലീഷ് നായര് ടീം ഒന്നിക്കുന്നു എന്ന പ്രത്യേകതയും ചിത്രത്തിനുണ്ട്.