കോവിഡ് പശ്ചാത്തലത്തിലുണ്ടായ സാമ്പത്തിക പ്രതിസന്ധി മറികടക്കാനായി മലയാള സിനിമയിലെ അഭിനേതാക്കളുടെ പ്രതിഫലം കുറയ്ക്കണമെന്ന് നിര്‍മ്മാതാക്കളുടെ സംഘടന പരസ്യമായി ആവശ്യപ്പെട്ടതില്‍ അതൃപ്തി അറിയിച്ച് താരസംഘടനയായ അമ്മ.
പ്രതിഫലം കുറയ്ക്കണമെന്ന് പരസ്യമായി ആവശ്യപ്പെട്ടത് ശരിയായില്ല. നേരിട്ട് കൂടിയാലോചന നടത്തി അറിയിക്കാമായിരുന്നു. പല താരങ്ങളും ഈ നിലപാടാണ് അറിയിച്ചതെന്ന് അമ്മ നേതൃത്വം വ്യക്തമാക്കി. ജനറല്‍ ബോഡി വൈകുന്ന സാഹചര്യത്തിലായിരുന്നു അമ്മ നേതൃത്വം അംഗങ്ങളുമായി ഇന്ന് അനൗപചാരിക കൂടിയാലോചന നടത്തിയത്.
അമ്മ ഭാരവാഹികളില്‍ പലരും സംസ്ഥാനത്തിന് പുറത്താണെന്നും എല്ലാവരുടേയും അഭിപ്രായം കേള്‍ക്കാതെ തീരുമാനമെടുക്കാനാവില്ലെന്നും ജനറല്‍ ബോഡി വൈകുമെന്നും അമ്മ നേതൃത്വം നേരത്തെ അറിയിച്ചിരുന്നു. മലയാള സിനിമയില്‍ താരങ്ങളും സാങ്കേതിക പ്രവര്‍ത്തകരും പ്രതിഫലം കുറയ്ക്കണമെന്ന് ആവശ്യപ്പെട്ട് വിവിധ ചലച്ചിത്ര സംഘടനകള്‍ക്ക് പ്രൊഡ്യൂസേഴ്‌സ് അസോസിയേഷന്‍ കത്തയക്കുകയായിരുന്നു.
