സിനിമാ സീരിയല് താരം വലിയശാല രമേശിന്റെ മരണത്തിന്റെ ഞെട്ടലിലാണ് മലയാള സിനിമ-സീരിയല് ലോകം. രമേശിന്റെ മരണം വിശ്വസിക്കാനാകുന്നില്ലെന്നായിരുന്നു നടന് ബാലാജി ശര്മ പ്രതികരിച്ചത്. രണ്ട് ദിവസം മുമ്പ് വരാല് എന്ന ചിത്രത്തില് ഒരുമിച്ചു അഭിനയിച്ചപ്പോഴും പൂര്ണ സന്തോഷവാനായിരുന്നുവെന്നും പിന്നീട് എന്തുസംഭവിച്ചുവെന്ന് അറിയില്ലെന്നും ബാലാജി പറയുന്നു.
‘രണ്ട് ദിവസം മുന്പ് വരാല് എന്ന ചിത്രത്തില് ഒരുമിച്ചു അഭിനയിച്ചപ്പോഴും പൂര്ണ സന്തോഷത്തിലായിരുന്നില്ലേ നിങ്ങള് ? എന്ത് പറ്റി രമേഷേട്ടാ ….?? എപ്പോഴും പോസിറ്റീവ് ആയി ചിരിച്ചു നടക്കുന്ന നിങ്ങള്ക്ക് എന്ത് സഹിക്കാന് പറ്റാത്ത ദുഃഖമാണുള്ളത് ? എന്തിനു ചേട്ടാ ഇങ്ങനൊരു കടും കൈ ? വിശ്വസിക്കാനാകുന്നില്ല ….,,, ഞെട്ടല് മാത്രം ! കണ്ണീര് പ്രണാമം …. നിങ്ങള് തന്ന സ്നേഹവും കരുതലും എന്നും മനസ്സിലുണ്ട് …. ആദരാഞ്ജലികള്.’-ബാലാജി ശര്മ പറഞ്ഞു.
‘പ്രശ്നങ്ങള് പലതും ഉണ്ടാകും. പക്ഷേ ജീവിതത്തില് നിന്നും ഒളിച്ച് ഓടിയിട്ട് എന്തു കാര്യം.. പ്രിയ സുഹൃത്ത് രമേശിന് ആദരാഞ്ജലികള് …’ പ്രൊഡക്ഷന് കണ്ട്രോളറും നിര്മാതാവുമായ ബാദുഷ കുറിച്ചു.
ശനിയാഴ്ച്ച പുലര്ച്ചയോടെ വീട്ടിലെ മുറിയില് മരിച്ച നിലയില് കണ്ടെത്തുകയായിരുന്നു. നാടകത്തിലൂടെ കലാരംഗത്ത് എത്തിയ രമേശ് വലിയശാല മലയാള സീരിയല് രംഗത്തെ ഏറ്റവും തിരക്കുള്ള നടന്മാരില് ഒരാളായിരുന്നു. 20 വര്ഷത്തോളമായി സീരിയല് രംഗത്ത് സജീവമായിരുന്നു. കണ്ണന് താമരക്കുളം സംവിധാനം ചെയ്ത വരാല് ആണ് അവസാനം അഭിനയിച്ച സിനിമ.