ചിരഞ്ജീവിയുടെ ഏറ്റവും പുതിയ ‘വാള്‍ട്ടര്‍ വീരയ്യ’യിലെ ‘ബോസ് പാര്‍ട്ടി’ പ്രമോ സോംഗിന് ട്രോള്‍ പൂരം. ‘പുഷ്പ’ സിനിമയിലെ അല്ലു അര്‍ജുനെ അനുകരിക്കുന്ന വിധം ഗാനരംഗത്തില്‍ പ്രത്യക്ഷപ്പെടുന്ന ചിരഞ്ജീവിക്കും ഗാനം ഒരുക്കിയ സംഗീത സംവിധായകന്‍ ദേവി ശ്രീ പ്രസാദിനും എതിരെയാണ് ട്രോളുകള്‍ എത്തുന്നത്.
ഗാനത്തിന്റെ വരികളെയും മ്യൂസിക്കിനെയും ട്രോളി കൊണ്ട് പലരും രംഗത്തെത്തുമ്പോള്‍ ചിരഞ്ജീവിയെ വിമര്‍ശിച്ചും കമന്റുകളും പോസ്റ്റുകളും എത്തുന്നുണ്ട്. കെ.എസ് രവിന്ദ്ര സംവിധാനം ചെയ്യുന്ന ചിത്രമാണ് വാള്‍ട്ടര്‍ വീരയ്യ. ചിരഞ്ജീവി ടൈറ്റില്‍ കഥാപാത്രമായി എത്തുമ്പോള്‍ തെലുങ്കിലെ മുന്‍നിര താരങ്ങളും സിനിമയില്‍ വേഷമിടുന്നുണ്ട്.
രവി തേജ, ശ്രുതി ഹസന്‍, കാതറിന്‍ തെരേസ, ബോബി സിംഹ, രാജേന്ദ്ര പ്രസാദ്, വെണ്ണല കിഷോര്‍, ഉര്‍വശി റൗട്ടേല എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. അടുത്ത വര്‍ഷം ജനുവരി 11ന് സംക്രാന്തി റിലീസ് ആയി ചിത്രം തിയേറ്ററുകളിലെത്തും. അതേസമയം, തുടര്‍ച്ചയായി പരാജയങ്ങളാണ് ചിരഞ്ജീവിയുടെ കരിയറില്‍ ഇപ്പോള്‍ ഉണ്ടാവുന്നത്.
ചിരഞ്ജീവിയും രാം ചരണും ഒന്നിച്ച, ഏറെ ഹൈപ്പ് ലഭിച്ച ‘ആചാര്യ’ എന്ന സിനിമ ബോക്‌സോഫീസില്‍ വന്‍ പരാജയമാണ് നേരിട്ടത്. ചിരഞ്ജീവിയുടെ കരിയറിലെ തന്നെ ഏറ്റവും വലിയ ഫ്‌ളോപ്പ് ആണ് ആചാര്യ. ഒടുവില്‍ തിയേറ്ററുകളില്‍ എത്തിയ ‘ഗോഡ്ഫാദര്‍’ സിനിമയുടെ പരാജയപ്പെട്ടിരുന്നു. അതിനാല്‍ തന്നെ വാള്‍ട്ടര്‍ വീരയ്യയെ പ്രതീക്ഷയോടെയാണ് ചിരഞ്ജീവി ആരാധകര്‍ കാണുന്നത്.