ഇന്ത്യയുടെ പിവി സിന്ധു ലോക ബാഡ്മിന്റണ്‍ ചാമ്പ്യന്‍ഷിപ്പില്‍ സ്വര്‍ണം നേടി രാജ്യത്തിന്‍റെ അഭിമാനമായി മാറിയിരുന്നു. ജപ്പാന്റെ നൊസോമി ഒകുഹാരയെ ഫൈനലില്‍ നേരിട്ടുള്ള രണ്ട് സെറ്റുകള്‍ക്ക് തകര്‍ത്ത സിന്ധുവിനെ രാജ്യം ആശംസകള്‍ കൊണ്ട് മൂടി. മലയാള സിനിമയില്‍ നിന്നും നിരവധി താരങ്ങള്‍ സിന്ധുവിന് ആശംസ നേര്‍ന്ന് രംഗത്തു വന്നു. മുന്‍നിര നായകന്മാരായ മമ്മൂട്ടിയും മോഹന്‍ലാലും ഇക്കൂട്ടത്തില്‍ ഉണ്ടായിരുന്നു.
മമ്മൂട്ടിയുടെയും മോഹന്‍ലാലിന്റെയും ആശംസ ട്വീറ്റുകള്‍ക്ക് നന്ദിയറിച്ച് പിവി സിന്ധു രംഗത്തു വന്നതാണ് ആരാധകരെ ത്രസിപ്പിച്ചിരിക്കുന്നത്. ഇരുവരുടെയും ട്വീറ്റുകള്‍ക്ക് സിന്ധു നന്ദിയറിയിച്ച് ട്വീറ്റ് ചെയ്തു. യുവനടന്‍ നിവിന്‍ പോളിയുടെയും ട്വീറ്റിന് സിന്ധു നന്ദിയറിച്ചിട്ടുണ്ട്.
ലോക ചാമ്പ്യന്‍ഷിപ്പില്‍ തുടര്‍ച്ചയായി മൂന്നു തവണയാണ് സിന്ധു ഫൈനലിലെത്തുന്നത്. കഴിഞ്ഞ രണ്ടു വര്‍ഷവും സിന്ധു ലോക ചാമ്പ്യന്‍ഷിപ്പ് ഫൈനലില്‍ കടന്നെങ്കിലും കലാശപ്പോരില്‍ തോറ്റ് വെള്ളിയില്‍ ഒതുങ്ങുകയായിരുന്നു. എന്നാല്‍ ഇത്തവണ പ്രയത്‌നം ലക്ഷ്യം കണ്ടു. ലോക ചാമ്പ്യന്‍ഷിപ്പില്‍ രണ്ടു വെങ്കല മെഡലുകളും സിന്ധുവിന്റെ പേരിലുണ്ട്.