സിനിമയില്‍ അഭിനയിക്കണമെന്ന് പറഞ്ഞപ്പോള്‍ അച്ഛന്‍ തനിക്ക് തന്ന രണ്ട് ഉപദേശങ്ങളെ കുറിച്ച് തുറന്ന് പറഞ്ഞ് കല്യാണി പ്രിയദര്‍ശന്‍. തെലുങ്ക് സിനിമയിലൂടെ അഭിനയരംഗത്തേക്ക് എത്തിയ താരം അച്ഛന്‍ പ്രിയദര്‍ശന്‍ ഒരുക്കുന്ന “മരക്കാര്‍: അറബിക്കടലിന്റെ സിംഹം” എന്ന ചിത്രത്തിലൂടെ മലയാളത്തിലേക്ക് അരങ്ങേറ്റം കുറിക്കുകയാണ്.
അഭിനയിക്കാനുള്ള താല്‍പര്യത്തെ കുറിച്ച് പറഞ്ഞപ്പോള്‍ രണ്ട് കാര്യങ്ങളാണ് അച്ഛന്‍ പറഞ്ഞത്, അതാണ് താന്‍ മുഖവിലക്കെടുത്തതെന്നും താരം ഒരു അഭിമുഖത്തിനിടെ വ്യക്തമാക്കി. സിനിമയെ സംബന്ധിച്ച് ഭാഷ പരിമിതിയില്ല, നല്ല സംവിധായകരുടെ സിനിമ മാത്രമേ ചെയ്യാവൂ എന്ന രണ്ട് ഉപദേശങ്ങളാണ് അച്ഛന്‍ തന്നതെന്ന് കല്യാണി പറഞ്ഞു.
തന്റെ ആദ്യ സംവിധായകന്‍ വിക്രം കുമാര്‍ അച്ഛന്റെ അസിസ്റ്റന്റായിരുന്നെന്നും അദ്ദേഹം നല്ല സംവിധായകന്‍ ആണെന്ന് അച്ഛനറിയാമായിരുന്നെന്നും കല്യാണി പറഞ്ഞു. തെലുങ്ക് മാത്രമല്ല ഏത് നല്ല സിനിമ തേടി വന്നാലും അത് സ്വീകരിക്കണമെന്നും അച്ഛന്‍ പറഞ്ഞതായും കല്യാണി പറഞ്ഞു. വിനീത് ശ്രീനിവാസന്‍ ഒരുക്കുന്ന “ഹൃദയം” ആണ് താരത്തിന്റെ അടുത്ത മലയാള ചിത്രം.