മലയാള സിനിമ ആരാധകര് ഒന്നടങ്കം ആവേശത്തോടെ കാത്തിരിക്കുന്ന ചിത്രമാണ് ലൂസിഫര്. മലയാളത്തിന്റെ പ്രിയ നടന് പൃഥ്വിരാജ് ആദ്യമായി സംവിധാനം ചെയ്യുന്ന ചിത്രം, നായകനായി മോഹന്ലാല് എന്നീ രണ്ട് പ്രത്യേകതകളാണ് ചിത്രത്തെ പ്രേക്ഷകര്ക്ക് ഏറെ പ്രിയങ്കരമാക്കുന്നത്. ചിത്രത്തിന്റെ റിലീസിനായി ദിവസങ്ങള് എണ്ണപ്പെട്ടു തുങ്ങിയതോടെ ചിത്രത്തിന്റേതായി പുറത്തിറങ്ങുന്ന ഓരോ ചിത്രങ്ങള്ക്കും വിശേഷങ്ങള്ക്കും സ്വീകാര്യതയേറെയാണ്. അത്തരത്തില് ഇന്ന് പൃഥ്വിരാജ് ഷെയര് ചെയ്ത ഒരു ലൊക്കേഷന് ചിത്രവും സോഷ്യല് മീഡിയയില് തരംഗമായിട്ടുണ്ട്.
ലൂസിഫറിന്റെ ലൊക്കേഷനില് മോഹന്ലാലിനൊപ്പം ഇരിക്കുന്ന ചിത്രമാണ് പൃഥ്വിരാജ് പങ്കുവെച്ചത്. “ഷൂട്ടിംഗിന്റെ ആദ്യ ദിവസം, ലൂസിഫറില് എനിക്ക് ഏറ്റവും പ്രിയപ്പെട്ട രംഗങ്ങളില് ഒന്ന്” എന്ന തലക്കെട്ടോടെയാണ് പൃഥ്വരാജ് ചിത്രം പങ്കുവെച്ചിരിക്കുന്നത്. മികച്ച സ്വീകാര്യതയാണ് സോഷ്യല് മീഡിയയില് ഈ ചിത്രത്തിന് ലഭിച്ചു കൊണ്ടിരിക്കുന്നത്. അതേസമയം, ചിത്രത്തിന്റെ സെന്സറിംഗ് നടപടികള് ഇന്ന് നടക്കും.
https://www.facebook.com/PrithvirajSukumaran/photos/a.130999383621801/2110970922291294/?type=3&theater
പൊളിറ്റിക്കല് ത്രില്ലര് ഗണത്തില് പെടുന്ന ചിത്രത്തില് സ്റ്റീഫന് നെടുമ്പള്ളി എന്ന രാഷ്ട്രീയ പ്രവര്ത്തകനെയാണ് മോഹന്ലാല് അവതരിപ്പിക്കുക. വലിയ മുതല് മുടക്കില് ഒരുങ്ങുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് മുരളി ഗോപിയാണ്. മഞ്ജു വാര്യരാണ് ചിത്രത്തില് നായിക. ബോളിവുഡ് താരം വിവേക് ഒബ്റോയി ആണ് വില്ലന്. ഇന്ദ്രജിത്ത്, കലാഭവന് ഷാജോണ്, ടൊവിനോ, ഫാസില്, മംമ്ത, ജോണ് വിജയ് എന്നിവരാണ് മറ്റുതാരങ്ങള്. ആശീര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് ലൂസിഫര് നിര്മ്മിക്കുന്നത്. ഈ മാസം 28 ന് ചിത്രം തിയേറ്ററുകളിലെത്തും.