മോഹന്ലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന ചിത്രം ലൂസിഫറിന്റെ സെന്സറിംഗ് പൂര്ത്തിയായി. ചിത്രത്തിന് ക്ലീന് യു സര്ട്ടിഫിക്കറ്റാണ് ലഭിച്ചിരിക്കുന്നത്. 2 മണിക്കൂര് 48 മിനിറ്റ് ആണ് സിനിമയുടെ ദൈര്ഘ്യം. ചിത്രം മുമ്പ് അറിയിച്ചിരിക്കുന്നതു പോലെ ഈ മാസം 28 ന് തന്നെ തിയേറ്ററുകളിലെത്തും.
ചിത്രത്തിന്റെ ട്രെയിലര് മാര്ച്ച് 22 ന് വൈകിട്ട് 6.30 ന് റിലീസ് ചെയ്യും. അബുദാബിയില് വെച്ച് നടത്തുന്ന ചടങ്ങിലാണ് ട്രെയിലര് പുറത്തിറക്കുക. അബുദാബിയിലെ ഡെല്മ ഹാളില് നടക്കുന്ന ചടങ്ങില് മോഹന്ലാല്,പൃഥ്വിരാജ്, മഞ്ജു വാര്യര്, ടൊവീനോ തോമസ്, മുരളി ഗോപി, നിര്മ്മാതാവ് ആന്റണി പെരുമ്പാവൂര് തുടങ്ങിയവര് ചടങ്ങില് പങ്കെടുക്കും.
പൊളിറ്റിക്കല് ത്രില്ലര് ഗണത്തില് പെടുന്ന ചിത്രത്തില് സ്റ്റീഫന് നെടുമ്പിള്ളി എന്ന രാഷ്ട്രീയ പ്രവര്ത്തകനെയാണ് മോഹന്ലാല് അവതരിപ്പിക്കുക. വലിയ മുതല് മുടക്കില് ഒരുങ്ങുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് മുരളി ഗോപിയാണ്. മഞ്ജു വാര്യരാണ് ചിത്രത്തില് നായിക. ബോളിവുഡ് താരം വിവേക് ഒബ്റോയി ആണ് വില്ലന്. ഇന്ദ്രജിത്ത്, കലാഭവന് ഷാജോണ്, ടൊവിനോ, ഫാസില്, മംമ്ത, ജോണ് വിജയ് എന്നിവരാണ് മറ്റുതാരങ്ങള്.
ആശീര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് ലൂസിഫര് നിര്മ്മിക്കുന്നത്. ഛായാഗ്രഹണം സുജിത്ത് വാസുദേവ്. സംഗീതം ദീപക് ദേവ്.