സിനിമാ പ്രേമികളുടെ കാത്തിരിപ്പിന് വിരാമം കുറിച്ച് പ്രഭാസിന്റെ ബിഗ് ബജറ്റ് ചിത്രം സാഹോ നാളെ തിയേറ്ററുകളിലേക്ക്. ഇന്ത്യയൊട്ടാകെ നാല് ഭാഷകളില് റിലീസിനെത്തുന്ന ചിത്രം ഏറെ ആവേശത്തോടെയാണ് പ്രേക്ഷകര് കാത്തിരിക്കുന്നത്. ഓണ്ലൈന് ബുക്കിംഗ് സൈറ്റുകളില് ടിക്കറ്റ് ബുക്കിംഗ് റെക്കോഡ് വേഗത്തില് പൂര്ത്തിയായതായാണ് റിപ്പോര്ട്ട്. ചിത്രത്തില് ബോളിവുഡ് നടി ശ്രദ്ധാ കപൂറാണ് നായിക.
ഹിന്ദി, തെലുങ്ക്, തമിഴ്, മലയാളം ഭാഷകളില് റിലീസ് ചെയ്യുന്ന ചിത്രം റണ് രാജ റണ് എന്ന തെലുങ്ക് ചിത്രത്തിലൂടെ ശ്രദ്ധേയനായ സുജീത്താണ് സംവിധാനം ചെയ്യുന്നത്. പ്രശസ്ത ഹോളിവുഡ് ആക്ഷന് കോ-ഓര്ഡിനേറ്റര് കെന്നി ബേറ്റ്സാണ് ചിത്രത്തിന്റെ ആക്ഷന് കൊറിയോഗ്രാഫര്. ബാഹുബലിയുടെ ആര്ട്ട് ഡയറക്ടറായിരുന്ന സാബു സിറിലാണ് കലാസംവിധായകന്. ഗിബ്രാന് പശ്ചാത്തലസംഗീതം നിര്വഹിക്കുന്ന ചിത്രത്തിന്റെ ഛായാഗ്രഹണം ആര്. മഥിയും എഡിറ്റിങ് ശ്രീകര് പ്രസാദുമാണ് നിര്വഹിക്കുന്നത്.
യുവി ക്രിയേഷന്സിന്റെ ബാനറില് നിര്മ്മിക്കുന്ന സിനിമയില് മലയാള ചലച്ചിത്രതാരം ലാലും ശ്രദ്ധേയമായ കഥാപാത്രമായി എത്തുന്നു. ജാക്കി ഷ്രോഫ്, നീല് നിതിന് മുകേഷ്, മന്ദിര ബേദി, ചങ്കി പാണ്ഡേ, മഹേഷ് മഞ്ജറേക്കര്, അരുണ് വിജയ്, മുരളി ശര്മ തുടങ്ങിയവരും ചിത്രത്തില് വേഷമിടുന്നു. ബി. ഉണ്ണികൃഷ്ണന്റെ ഉടമസ്ഥതയിലുളള ആര്.ഡി. ഇല്യുമിനേഷനാണ് ചിത്രം കേരളത്തില് വിതരണത്തിനെത്തിക്കുന്നത്.