ബ്രഹ്മാണ്ഡ ചിത്രം ‘കല്ക്കി 2898 എഡി’ക്ക് ശേഷം ഹൊറര് കോമഡി ഴോണറില് പുതിയ ചിത്രവുമായി വരികയാണ് പ്രഭാസ്. ‘ദ രാജാസാബ്’ എന്ന ചിത്രമാണ് പ്രഭാസിന്റെതായി ഒരുങ്ങി കൊണ്ടിരിക്കുന്നത്. സിനിമയ്ക്കായി പ്രഭാസ് പ്രതിഫലം കുറച്ചുവെന്ന വാര്ത്തകളാണ് ഇപ്പോള് പുറത്തുവരുന്നത്. 150 കോടിയോളമാണ് നിലവില് പ്രഭാസിന്റെ പ്രതിഫലം.
രാജാസാബിനായി പ്രതിഫലം കുറച്ച് 100 കോടി രൂപയാക്കി എന്നാണ് പ്രഭാസ് പറഞ്ഞിരിക്കുന്നത്. ചിത്രത്തിന്റെ ബജറ്റ് 400 കോടി രൂപയാണ് എന്നും വാര്ത്തകളുണ്ട്. അതേസമയം പ്രഭാസിന്റെ പിറന്നാളിനോട് അനുബന്ധിച്ച് ചിത്രത്തിന്റെ പുതിയ പോസ്റ്റര് പുറത്തിറക്കിയിരുന്നു. വ്യത്യസ്ത ഗെറ്റപ്പില്, ഇതുവരെ കാണാത്ത ലുക്കിലാണ് പ്രഭാസ് പോസ്റ്ററില് പ്രത്യക്ഷപ്പെട്ടത്.
ഫാമിലി എന്റര്ടെയ്നറായെത്തിയ ‘പ്രതി റോജു പാണ്ഡഗെ’, റൊമാന്റിക് കോമഡി ചിത്രമായ ‘മഹാനുഭാവുഡു’ എന്നീ സിനിമകള്ക്ക് ശേഷം മാരുതി തിരക്കഥയെഴുതി സംവിധാനം ചെയ്യുന്ന ചിത്രമാണ് ദ രാജാസാബ്. മാളവിക മോഹനന് ആണ് ചിത്രത്തില് നായികയായെത്തുന്നത്. ഹൊറര് റൊമാന്റിക് കോമഡിയാണ് ചിത്രമെന്നാണ് സൂചന.
തെലുങ്ക്, തമിഴ്, മലയാളം, കന്നഡ, ഹിന്ദി എന്നീ അഞ്ച് ഭാഷകളിലായി പ്രദര്ശനത്തിനെത്തും. 2025 ഏപ്രില് 10ന് ആണ് ചിത്രം റിലീസിന് ഒരുങ്ങുന്നത്. പീപ്പിള് മീഡിയ ഫാക്ടറിയുടെ ബാനറില് ടിജി വിശ്വപ്രസാദ് ആണ് ചിത്രം നിര്മ്മിക്കുന്നത്. വിവേക് കുച്ചിബോട്ലയാണ് സഹനിര്മ്മാതാവ്.