തെന്നിന്ത്യയിൽ ഏറ്റവുമധികം പ്രതിഫലം വാങ്ങുന്ന നടിമാരിൽ രണ്ടാംസ്ഥാനം കരസ്ഥമാക്കി നടി പൂജ ഹെഗ്‌ഡെ. പുതിയ ചിത്രം ‘ജന ഗണ മന’യ്ക്കാണ് നടി പൂജ പ്രതിഫലം കുത്തനെ കൂട്ടിയത്. അഞ്ച് കോടി രൂപയാണ് ചിത്രത്തിനായി നടി വാങ്ങുന്ന പ്രതിഫലമെന്നാണ് പുറത്തു വരുന്ന റിപ്പോർട്ട്. നിലവിൽ തെന്നിന്ത്യയിൽ ഏറ്റവും കൂടുതൽ പ്രതിഫലം വാങ്ങുന്നത് നയൻതാരയാണ്. അഞ്ച് കോടി മുതൽ ഏഴ് കോടിവരെയാണ് നടിയുടെ പ്രതിഫലം.
പട്ടികയിൽ രണ്ടാം സ്ഥാനത്ത് നിന്നിരുന്ന സാമന്തയെ പിന്നാലാക്കിയാണ് പൂജ രണ്ടാമതെത്തിയത്. ‘ജന ഗണ മന’യിൽ നിരവധി ആക്ഷൻ രംഗങ്ങൾ നടി ചെയ്യുന്നുണ്ട്. ഇതും പ്രതിഫലം കൂട്ടാൻ കാരണമായിയെന്നാണ് വ്യക്തമാക്കുന്നത്. ചിത്രത്തിൽ നായക കഥാപാത്രത്തെ അവതരിപ്പിക്കുന്നത് വിജയ് ദേവർകൊണ്ടയാണ്.
സിനിമയുടെ ചിത്രീകരണം കഴിഞ്ഞ ദിവസം ആരംഭിച്ചിരുന്നു. ഹിന്ദി, തെലുങ്ക്, തമിഴ്, കന്നഡ, മലയാളം എന്നീ ഭാഷകളിൽ റിലീസ് ചെയ്യുന്ന ഒരു പാൻ ഇന്ത്യ ആക്ഷൻ എന്റർടെയ്‌നർ ചിത്രമാണ് ‘ജെജിഎം’.ചിത്രത്തിന്റെ രചനയും സംവിധാനവും നിർവഹിക്കുന്നത് പുരി ജഗന്നാഥാണ്.
വിജയ് ദേവർകൊണ്ട ആർമി യൂണിഫോമിൽ നിൽക്കുന്ന പോസ്റ്റർ ഏറെ ചർച്ച ചെയ്യപ്പെട്ടിരുന്നു. ചാർമ്മി കൗർ, വംശി പൈഡിപ്പള്ളി പ്രൊഡ്യൂസർ ശ്രീകര സ്റ്റുഡിയോ, ശ്രീകര സ്റ്റുഡിയോയുടെ ഡയറക്ടർ സിങ്ക റാവു എന്നിവരാണ് ചിത്രം നിർമ്മിക്കുന്നത്.