നാല് വര്‍ഷത്തെ ഇടവേളക്ക് ശേഷം പുതിയ ചിത്രവുമായെത്തിയ കിംഗ് ഖാന് രാജകീയ വരവേല്‍പ്പ് നല്‍കിയിരിക്കുകയാണ് കേരളം. ആദ്യ ദിനം തന്നെ ചിത്രത്തിന് മികച്ച അഭിപ്രായം ലഭിച്ചതോടെ നൂറ് കണക്കിന് ഷോകള്‍ ഹൗസ് ഫുള്ളായി.
കേരളത്തില്‍ നിന്ന് ചിത്രം പത്ത് കോടിക്ക് മുകളില്‍ നേടിയെന്നാണ് പ്രമുഖ ട്രേഡ് അനലിസ്റ്റായ ശ്രീധര്‍ പിള്ള പങ്കുവെച്ചിരിക്കുന്നത്്. 105 സ്‌ക്രീനുകളില്‍ നിന്നാണ് ഇത്രയും തുക ചിത്രം നേടിയത്. ജവഹര്‍ ഫിലിംസാണ് ചിത്രം കേരളത്തില്‍ റിലീസിനെത്തിച്ചത്.
ഏറ്റവും വേഗത്തില്‍ 300 കോടി കളക്ഷന്‍ നേടിയ ഇന്ത്യന്‍ ചിത്രമെന്ന നേട്ടം ഇനി പഠാനാണ്. ചിത്രം ഇതുവരെ ആഗോളതലത്തില്‍ 600 കോടി കളക്ഷന്‍ പിന്നിട്ടിട്ടുണ്ട്.
കെജിഎഫ് ചാപ്റ്റര്‍ 2, ബാഹുബലി 2, ദംഗല്‍ എന്നീ ചിത്രങ്ങളുടെ കളക്ഷന്‍ ആണ് ചിത്രം ഒരാഴ്ചയില്‍ മറികടന്നത്. ദംഗല്‍ 13 ദിവസം കൊണ്ടും ബാഹുബലി 2 ഹിന്ദി വേര്‍ഷന്‍ പത്ത് ദിവസം കൊണ്ടും കെജിഎഫ് 2 ഹിന്ദി വേര്‍ഷന്‍ 11 ദിവസം കൊണ്ടുമാണ് 300 കോടി ക്ലബ്ബില്‍ എത്തിയത്.
2018ല്‍ പുറത്തിറങ്ങിയ ‘സീറോ’യ്ക്ക് ശേഷം ഷാരൂഖ് ഖാന് നായകനായെത്തുന്ന ചിത്രമാണിത്. കരിയറിലെ തുടര്‍ച്ചയായ പരാജയങ്ങള്‍ കൊണ്ട് ഇടവേളയെടുത്ത് പോകുന്നതായി ഷാരൂഖ് അറിയിക്കുന്നത് നാല് വര്‍ഷങ്ങള്‍ക്ക് മുന്‍പാണ്.
