ഇര്‍ഷാദിനെ നായകനാക്കി ഒമര്‍ ലുലു സംവിധാനം ചെയ്യുന്ന ‘നല്ല സമയം’ ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്ത്. ഇര്‍ഷാദും നടന്‍ വിജീഷും ഒപ്പം അഞ്ച് പുതുമുഖ നായികമാരുമാണ് പോസ്റ്ററിലുള്ളത്. ഒമര്‍ ലുലു സംവിധാനം ചെയ്യാന്‍ പോകുന്ന അഞ്ചാമത്തെ ചിത്രമാണിത്.
നീന മധു, ഗായത്രി ശങ്കര്‍, നോറ ജോണ്‍സണ്‍, നന്ദന സഹദേവന്‍, സുവൈബത്തുല്‍ ആസ്ലമിയ്യ എന്നീ പുതുമുഖങ്ങള്‍ ആണ് നായികാ വേഷങ്ങളില്‍ എത്തുന്നത്. ശാലു റഹീം, ശിവജി ഗുരുവായൂര്‍, ജയരാജ് വാര്യര്‍ എന്നിവരാണ് ചിത്രത്തിലെ മറ്റ് താരങ്ങള്‍.
സ്വാമിനാഥന്‍ എന്നാണ് ഇര്‍ഷാദിന്റെ കഥാപാത്രത്തിന്റെ പേര്. നല്ല സമയം എന്ന സിനിമ മോഹന്‍ലാലിനെ മനസില്‍ കണ്ട് എഴുതിയതാണെന്നും എന്നാല്‍ പിന്നീട് ഇര്‍ഷാദിലേക്ക് എത്തിയതാണെന്നും ഒമര്‍ ലുലു ഫെയ്‌സ്ബുക്ക് കുറിപ്പിലൂടെ പറഞ്ഞിരുന്നു.
ലാലേട്ടന്‍ എന്ന ഫാക്ടറിലേക്ക് എത്താനുള്ള ദൂരം ആലോചിച്ച ശേഷം പിന്നെയാര് എന്ന ചോദ്യം വന്നപ്പോഴാണ് തന്റെ നാട്ടുകാരനായ ഇര്‍ഷാദിലേക്ക് സിനിമ എത്തുന്നത് എന്നാണ് ഒമര്‍ ലുലു പറഞ്ഞത്. തൃശൂര്‍ പശ്ചാത്തലമാക്കി ഒരുക്കിയ ചിത്രത്തില്‍ ഇര്‍ഷാദ് പൂണ്ട് വിളയാടിയിട്ടുണ്ട് എന്നാണ് തന്റെ വിശ്വാസമെന്നും ഒമര്‍ പറഞ്ഞിരുന്നു.
