തെരി, മെർസൽ, ജവാൻ തുടങ്ങിയ സിനിമകളിലൂടെ സിനിമാപ്രേമികളെ ഞെട്ടിച്ച അറ്റ്ലി ഒരുക്കുന്ന അടുത്ത ചിത്രത്തിൽ നായകനായി എത്തുന്നത് അല്ലു അർജുൻ ആണ്. പുഷ്പ 2 വിന്റെ ഗംഭീര വിജയത്തിന് ശേഷം അല്ലു അർജുൻ നായകനാകുന്ന ചിത്രമാണിത്. ചിത്രത്തിൽ അല്ലു അർജുൻ മൂന്ന് വേഷങ്ങളിലായിരിക്കും എത്തുക എന്ന റിപ്പോർട്ടാണ് ഇപ്പോൾ പുറത്തു വരുന്നത്.
ഇത് അല്ലുവിന്റെ ആദ്യത്തെ ട്രിപ്പിൾ റോളായിരിക്കും. മാത്രമല്ല ഈ മൂന്ന് വേഷങ്ങളിൽ ഒന്ന് ഒരു അനിമേഷൻ കഥാപാത്രമായിരിക്കും എന്നാണ് പുറത്തു വരുന്ന റിപോർട്ടുകൾ. ഇത് പാരലൽ യൂണിവേഴ്‌സിലുള്ള കഥാപാത്രമാകാൻ സാധ്യതയുണ്ടെന്നും അതിൽ ഒരു കഥാപാത്രം നെഗറ്റീവ് സ്വഭാവമുള്ളതായിരിക്കും എന്നും സൂചനയുണ്ട്.
പ്രൊജക്റ്റിന്റെ നിർമാണം സൺ പിക്‌ചേഴ്‌സ് ആണ്. പ്രഖ്യാപനത്തിന്റെ ഭാഗമായി രണ്ടു മിനിറ്റുള്ള ഒരു വിഡിയോയും സൺ പിക്‌ചേഴ്‌സ് പുറത്തു വിട്ടിരുന്നു. ചിത്രത്തിൽ അഭിനയിക്കാൻ അല്ലു അർജുൻ 175 കോടി പ്രതിഫലം വാങ്ങുന്നതായി റിപോർട്ടുകൾ വന്നിരുന്നു. ഇത് കൂടാതെ സിനിമയുടെ ലാഭത്തിൽ നിന്നും 15 ശതമാനവും നിർമാതാക്കൾ താരത്തിന് നൽകുമെന്നും റിപ്പോർട്ടുകളുണ്ട്.
