നടി നൂറിന് ഷെരീഫ് പ്രധാന കഥാപാത്രമായി എത്തുന്ന “എന്റെ നാട്-ഫ്രം ഗോഡ്സ് ഓണ് കണ്ട്രി” എന്ന കേരള മ്യൂസിക്കല് കോണ്സെപ്റ്റിന്റെ ടീസര് ശ്രദ്ധേയമാകുന്നു. ഇന്നലെ കേരളപ്പിറവി ദിനത്തിലാണ് ടീസര് പുറത്തുവിട്ടത്. കേരളത്തിന്റെ സാംസ്കാരിക സാമൂഹിക പൈതൃകമാണ് “എന്റെ നാട്-ഫ്രം ഗോഡ്സ് ഓണ് കണ്ട്രി” പറയുക.
മലയാള സിനിമയിലെ മറ്റൊരു യുവതാരവും നൂറിനൊപ്പം വീഡിയോയില് എത്തും. നവാഗതരായ ദീപക് കെ. സി യും വിശാല് ബാബുവും സംവിധാനം ചെയുന്ന മ്യൂസിക് വീഡിയോ ന്യൂ ഇന്ത്യ പ്രൊഡക്ഷന്സ് ആണ് നിര്മ്മിക്കുന്നത്. ഗണേശ് വെങ്കടരമണി ഒരുക്കിയ ഗാനം ഗൗരി ലക്ഷ്മി ആണ് ആലപിക്കുന്നത്.
മുഹമ്മദ് നൗഫല്, സഹദ് എന്നിവര് ഛായാഗ്രഹണവും സുധീഷ് എം.എസ് എഡിറ്റിംഗും നിര്വ്വഹിക്കുന്നു. കഴിഞ്ഞ വര്ഷം മുതല് ചിത്രീകരണം ആരംഭിച്ച എന്റെ നാട് അടുത്ത വര്ഷം ജനുവരിയോടെ പുറത്തിറക്കാനാണ് അണിയറപ്രവര്ത്തകര് ശ്രമിക്കുന്നത്.
ഒരു അഡാറ് ലവ് എന്ന ഒമര്ലുലു ചിത്രത്തിലൂടെ മലയാള സിനിമാരംഗത്തേക്ക് എത്തിയ താരമാണ് നൂറിന് ഷെരീഫ്. ഒമറിന്റെ ധമാക്ക ചിത്രത്തിലും നൂറിന് എത്തിയിരുന്നു. വെള്ളേപ്പം ആണ് താരത്തിന്റെതായി ഒരുങ്ങുന്ന പുതിയ ചിത്രം.