നടൻ നിവിൻ പോളി 2022ല്‍ ഡിയർ സ്റ്റുഡൻ്റ്സ് എന്ന ചിത്രത്തിന്റെ പ്രഖ്യാപനം നടത്തിയിരുന്നു. നവാഗതരായ സന്ദീപ് കുമാറും ജോർജ് ഫിലിപ്പ് റോയിയും ചേർന്നാണ് ചിത്രത്തിൻ്റെ രചനയും സംവിധാനവും നിർവ്വഹിക്കുന്നത്. ഇപ്പോഴിതാ ഏറ്റവും പുതിയ സംഭവവികാസത്തിൽ നയൻതാര ചിത്രത്തിലേക്കെത്തിയിരിക്കുന്ന വിവരമാണ് പുറത്തുവന്നിരിക്കുന്നത്.
ചിത്രത്തിലെ നായികാ കഥാപാത്രത്തെ അവതരിപ്പിക്കാൻ നയൻതാരയുമായി സിനിമയുടെ അണിയറ പ്രവര്‍ത്തകര്‍ ചർച്ച നടത്തുന്നതായി നേരത്തെ വാർത്തകൾ വന്നിരുന്നു. ഇപ്പോൾ ഇതില്‍ ഔദ്യോഗിക സ്ഥിരീകരണം വന്നിരിക്കുകയാണ്.
ചിത്രത്തിന്റെ നിർമ്മാതാക്കളായ പോളി ജൂനിയർ പിക്‌ചേഴ്‌സ് തങ്ങളുടെ യൂട്യൂബ് ചാനലില്‍ ഡിയർ സ്റ്റുഡൻ്റ്സ് എന്ന ചിത്രത്തിൻ്റെ ‘നയൻതാര ഓൺ ബോർഡ്’ മോഷൻ പോസ്റ്റർ ഞായറാഴ്ച പങ്കിട്ടു. ക്രിയേറ്റീവ് വീഡിയോയിൽ നയൻതാരയെ നായികയായി അവതരിപ്പിക്കുന്നു. സ്‌കൂള്‍ വിദ്യാര്‍ത്ഥികളുടെ കഥയെ ആസ്പദമാക്കിയാണ് ചിത്രം ഒരുങ്ങുന്നതെന്നാണ് സൂചന.
View this post on Instagram
2022 മാര്‍ച്ച് 31 ന് ചിത്രത്തിന്റെ ടൈറ്റില്‍ പോസ്റ്റര്‍ റിലീസ് ചെയ്തിരുന്നു. ശേഷം ചിത്രത്തെ കുറിച്ചുള്ള അപ്‌ഡേറ്റുകളൊന്നും ഉണ്ടായിരുന്നില്ല. നേരത്തെ ധ്യാന്‍ ശ്രീനിവാസന്‍ ആദ്യമായി സംവിധാനം ചെയ്ത ‘ലവ് ആക്ഷന്‍ ഡ്രാമ’ എന്ന ചിത്രത്തില്‍ നിവിന്റെ നായികയായി വേഷമിട്ടത് നയന്‍താരയായിരുന്നു.