ഏതാനും മാസങ്ങള്‍ക്ക് മുമ്പാണ് നടി നിവേദ തോമസ് കടുത്ത ബോഡി ഷെയ്മിങ്ങിന് ഇരയായത്. ’35 ചിന്ന കഥ കാതു’ എന്ന ചിത്രത്തിന്റെ പ്രമോഷന്‍ പരിപാടിക്കായി എത്തിയ താരത്തിന്റെ രൂപമാറ്റം ചര്‍ച്ചയാവുകയായിരുന്നു. ബോഡി ഷെയ്മിങ് കമന്റുകള്‍ ഒരുപാട് എത്തിയെങ്കിലും നടി പ്രതികരിച്ചിരുന്നില്ല. എന്നാല്‍ വിമര്‍ശകരുടെ വായ തനിയെ അടഞ്ഞിരിക്കുകയാണ് ഇപ്പോള്‍.
14 വര്‍ഷത്തിന് ശേഷം പ്രഖ്യാപിച്ച തെലങ്കാന സര്‍ക്കാരിന്റെ മികച്ച നടിക്കുള്ള സംസ്ഥാന പുരസ്‌കാരമാണ് നിവേദ സ്വന്തമാക്കിയത്, അതും ’35 ചിന്ന കഥ കാതു’ എന്ന ചിത്രത്തിലൂടെ. നന്ദ കിഷോറിന്റെ സംവിധാനത്തില്‍ എത്തിയ ചിത്രം സെപ്റ്റംബര്‍ 6ന് ആണ് റിലീസ് ചെയ്തത്. ചിത്രത്തില്‍ രണ്ട് കുട്ടികളുടെ അമ്മയായ, സരസ്വതി എന്ന കഥാപാത്രത്തെയാണ് നിവേദ അവതരിപ്പിച്ചത്.
മികച്ച കുട്ടികളുടെ ചിത്രം, മികച്ച ബാലതാരം (അരുണ്‍ ദേവ്) എന്നീ പുരസ്‌കാരങ്ങളും 35 ചിന്ന കഥ കാതു സിനിമ നേടിയിട്ടുണ്ട്. തെലുങ്ക് താരം വിശ്വദേവ രചകോണ്ടയാണ് നായകനായത്. ഈ സിനിമയ്ക്കായാണ് നടി വണ്ണം കൂട്ടിയത് എന്ന കമന്റുകളും അന്ന് എത്തിയിരുന്നു. ഹോര്‍മോണ്‍ പ്രശ്‌നങ്ങളാണ് രൂപമാറ്റത്തിന് കാരണമെന്ന ചര്‍ച്ചകളും നടന്നിരുന്നു. ഈ വിമര്‍ശനങ്ങള്‍ക്കെല്ലാമുള്ള മറുപടിയാണ് നിവേദയുടെ അവാര്‍ഡ് നേട്ടം.
അതേസമയം, ‘വെറുതെ ഒരു ഭാര്യ’ എന്ന ചിത്രത്തില്‍ ജയറാമിന്റെ മകളായാണ് നിവേദ വെള്ളിത്തിരയില്‍ അരങ്ങേറുന്നത്. പിന്നീട് മധ്യവേനല്‍, പ്രണയം, ചാപ്പ കുരിശ്, റോമന്‍സ് തുടങ്ങിയ ചിത്രങ്ങളില്‍ അഭിനയിച്ചു. ‘എന്താടാ സജി’ ആണ് മലയാളത്തില്‍ നിവേദയുടെതായി ഒടുവില്‍ പുറത്തിറങ്ങിയ ചിത്രം. തെലുങ്ക്, തമിഴ് ഭാഷകളില്‍ സജീവമാണ് താരം.