വിജയ് ദേവരകൊണ്ട ചിത്രം ‘ഫാമിലി സ്റ്റാറി’നെതിര കടുത്ത ഡീഗ്രേഡിങ് ക്യാംപെയ്ന്. ചിത്രത്തിനെതിരെ സംഘടിത നെഗറ്റീവ് ക്യാംപെയ്ന് നടക്കുന്നുവെന്ന് ആരോപിച്ച് ചിത്രത്തിന്റെ നിര്മ്മാതാക്കള് സൈബര് സെല്ലിന് പരാതി നല്കി. സിനിമയുടെ പ്രദര്ശനത്തെ ബാധിക്കുന്ന തരത്തിലുള്ള ക്യാംപെയ്ന് സോഷ്യല് മീഡിയയിലൂടെ നടക്കുന്നുവെന്നാണ് നിര്മാതാക്കളുടെ പരാതി.
ചിത്രത്തിനെതിരെ ആക്രമണം നടത്തിയ വ്യാജ യൂസര് ഐഡികള് കണ്ടെത്താന് പൊലീസ് നടപടികള് ആരംഭിച്ചിട്ടുണ്ട് എന്നാണ് വിവരം. ഇത്തരം സംഘടിത ആക്രമണം പതിവാണെന്നാണെന്നും ഈയടുത്ത് പുറത്തിറങ്ങിയ ‘ഗാമി’, ഹനുമാന്’ എന്നീ ചിത്രങ്ങളും സംഘടിത ആക്രമണം നേരിട്ടുവെന്നും നിര്മാതാക്കള് പറയുന്നുണ്ട്.
ഇന്ത്യയില് നിന്നും വെറും നാല് ലക്ഷം രൂപ മാത്രമാണ് ഓപ്പണിംഗ് ദിനത്തില് ചിത്രത്തിന് നേടാനായ കളക്ഷന് എന്നാണ് ബോക്സ് ഓഫീസ് ട്രാക്കര്മാര് റിപ്പോര്ട്ട് ചെയ്യുന്നത്. എന്നാല് ആഗോളതലത്തില് 5.75 കോടി രൂപയാണ് നേടിയത് എന്നും റിപ്പോര്ട്ടുകളുണ്ട്.
വിജയ് ദേവരകൊണ്ടയുടെ ‘ഗീതാഗോവിന്ദം’ സിനിമയുടെ സംവിധായകനായ പരശുറാം ആണ് ഫാമിലി സ്റ്റാറും ഒരുക്കിയത്. എന്നാല് വിജയ്ക്ക് ഹൈയെസ്റ്റ് ഗ്രോസ് സമ്മാനിച്ച സംവിധായകന് ഇപ്പോള് ഒരു അബദ്ധം സൃഷ്ടിച്ചു എന്നിങ്ങനെയുള്ള കമന്റുകളാണ് സോഷ്യല് മീഡിയയില് വന്നു കൊണ്ടിരിക്കുന്നത്.
ഇതുവരെ ഒന്നിച്ച് അഭിനയിച്ച എല്ലാ നടിമാര്ക്കും ഫ്ളോപ്പ് സമ്മാനിച്ച് ഒടുവില് മൃണാള് ഠാക്കൂറിന്റെ കരിയറിലെ ആദ്യ പരാജയവും വിജയ് നല്കി എന്നും ട്രോളുകളില് നിറയുന്നുണ്ട്. വിജയ്യും മൃണാളും ഒന്നിച്ചുള്ള ലിപ് കിസ്സിന്റെ വീഡിയോ പങ്കുവച്ചു കൊണ്ടും വിമര്ശനങ്ങള് നടക്കുന്നുണ്ട്. വിജയ് ദേവരകൊണ്ടയുടെ എല്ലാ സിനിമയിലും ഈ ഒരേ സീന് ഉണ്ടാകും എന്ന് പറഞ്ഞാണ് ചിലരുടെ വിമര്ശനം.