നെറ്റ്ഫ്ളിക്സ് ഇന്ത്യയുടെ സൗത്ത് ഇന്ത്യന് ആന്തത്തില് മലയാളി സാന്നിദ്ധ്യമായി നീരജ് മാധവ്. ദക്ഷിണേന്ത്യന് സംസ്ഥാനങ്ങളിലെ പ്രേക്ഷകരോട് സംവദിക്കാന് പ്രത്യേക ട്വിറ്റര് ഹാന്ഡില് തുടങ്ങിയതിന് പിന്നാലെ സൗത്ത് ആന്തം എത്തിയിരിക്കുന്നത്. “നമ്മ സ്റ്റോറീസ്” റാപ് ആന്തത്തില് അറിവ്, സിരി, ഹനുമാന് കൈന്ഡ് എന്നിവരുമുണ്ട്.
നൂറ് ശതമാനം സാക്ഷരത, ശശി തരൂരിന്റെ ഇംഗ്ലീഷ് പ്രാവീണ്യം, റസൂല് പൂക്കൂട്ടിയുടെ ഓസ്കാര് നേട്ടം, മോഹന്ലാല്, മമ്മൂട്ടി, പൊറോട്ടയും ബീഫും, ചെണ്ടമേളം, കഥകളി, വള്ളംകളി, നാടന് തല്ല് തുടങ്ങിയവയാണ് നീരജ് മാധവിന്റെ വരികളില്.
മലയാളം, തമിഴ്, കന്നഡ, തെലുങ്ക് ഭാഷകളില് നിന്നായി പരമാവധി കണ്ടന്റുകള് സൃഷ്ടിക്കാനുള്ള നീക്കത്തിന്റെ ഭാഗമായി കഴിഞ്ഞ ദിവസമാണ് നെറ്റ്ഫ്ളിക്സ് ഇന്ത്യ സൗത്ത് എന്ന പേരില് പുതിയ ട്വിറ്റര് ഹാന്ഡില് തുടങ്ങിയത്. നെറ്റ്ഫ്ളിക്സിന്റെ ഫ്ളാഗ് ഷിപ്പ് സീരീസുകളിലൊന്നായ നാര്കോസിലെ പാബ്ലോ എസ്കോബാര് മുണ്ടുടുത്ത ചിത്രം പങ്കുവെച്ചാണ് നെറ്റ്ഫ്ളിക്സ് പുതിയ അക്കൗണ്ട് പ്രഖ്യാപിച്ചത്.
മമ്മൂട്ടി ചിത്രം ഷൈലോക്കിലെ ദൃശ്യങ്ങള്ക്ക് ധനുഷിന്റെ മാരിയിലെ മ്യൂസിക് പശ്ചാത്തല സംഗീതമായി ഇട്ട് എഡിറ്റ് ചെയ്ത ഒരു വീഡിയോ കമന്റായി വന്നു. “മാരിയും മമ്മൂക്കയും അടിപൊളി, ഈ ക്രോസ് ഓവര് കലക്കി” എന്നായിരുന്നു നെറ്റ്ഫ്ളിക്സ് ഇന്ത്യ കുറിച്ചത്.