പ്രേക്ഷകര് ഏറെ പ്രതീക്ഷയോടെ കാത്തിരിക്കുന്ന ഫഹദ് ഫാസില് ചിത്രം ട്രാന്സിലെ നസ്രിയയുടെ ലുക്ക് പുറത്തുവിട്ടു. ചുണ്ടില് എരിയുന്ന സിഗരറ്റുമായാണ് നസ്രിയ പോസ്റ്ററില് പ്രത്യക്ഷപ്പെട്ടിരിക്കുന്നത്. നേരത്തെ ചിത്രത്തിലെ ഫഹദ് ഫാസിലെ ലുക്കും അണിയറ പ്രവര്ത്തകര് പുറത്തുവിട്ടിരുന്നു.
രണ്ട് വര്ഷം ഷൂട്ടിംഗ് നീണ്ട ചിത്രത്തിന്റെ ഷൂട്ട് അടുത്തിടെയാണ് പൂര്ത്തിയായത്. 2017 ജൂലൈയില് ചിത്രീകരണം ആരംഭിച്ച ചിത്രം നാല് ഷെഡ്യൂളുകളിലാണ് പൂര്ത്തിയാക്കിയത്. ഏഴ് വര്ഷത്തിനു ശേഷം അന്വര് റഷീദ് സംവിധാനം ചെയ്യുന്ന മുഴുനീള ചിത്രമാണ് ട്രാന്സ്. 2012- ല് പുറത്തിറങ്ങിയ ദുല്ഖര് സല്മാന് ചിത്രം ഉസ്താദ് ഹോട്ടലാണ് അന്വര് റഷീദ് അവസാനം സംവിധാനം ചെയ്ത ചിത്രം. ഇതിനിടെ “അഞ്ചു സുന്ദരികള്” എന്ന ആന്തോളജി ചിത്രത്തില് “ആമി” എന്ന ഭാഗം അദ്ദേഹം സംവിധാനം ചെയ്തിരുന്നു.
വിനായകന്, ഗൗതം വാസുദേവ് മേനോന്, നസ്രിയാ നസിം, സൗബിന് ഷാഹിര്, ശ്രീനാഥ് ഭാസി, ജോജു ജോര്ജ്, ധര്മജന്, ആഷിക്ക് അബു, ബൈജു, അശ്വതി മേനോന്, ദിലീഷ് പോത്തന്, വിനീത് വിശ്വന് തുടങ്ങി വന്താര നിരയാണ് ചിത്രത്തില് അണിനിരക്കുന്നത്. അന്വര് റഷീദ് എന്റര്ടെയിന്മെന്റ് നിര്മ്മിക്കുന്ന ചിത്രത്തിന്റെ ഛായാഗ്രാഹകന് അമല് നീരദാണ്. 20 കോടി മുതല്മുടക്കിലാണ് ചിത്രം ഒരുങ്ങുന്നത്. ചിത്രം ഡിസംബറില് തിയേറ്ററുകളിലെത്തും.