ഡിസംബര് ഒന്നിന് തിയേറ്ററുകളില് എത്തിയ നയന്താര ചിത്രം ‘അന്നപൂരണി’ ഇനി ഒ.ടി.ടിയില് കാണാം. ചിത്രം റിലീസ് ചെയ്ത് ഒരു മാസം ആകുന്നതിന് മുമ്പാണ് ഒ.ടി.ടിയില് എത്തുന്നത്. നെറ്റ്ഫ്ലിക്സിലാണ് അന്നപൂരണി പ്രദര്ശനത്തിന് എത്തുക. ഡിസംബര് 29ന് സ്ട്രീമിംഗ് ആരംഭിക്കും.
നയന്താരയുടെ 75-ാമത് ചിത്രമായ അന്നപൂരണിയില് ഒരു ഷെഫിന്റെ വേഷത്തിലാണ് നയന്താര എത്തിയത്. കുട്ടിക്കാലം മുതല് ഷെഫ് ആകാന് കൊതിച്ച ബ്രാഹ്മണ കുടുംബത്തിലെ കഥാപാത്രമായാണ് നയന്താര എത്തുന്നത്. ഷെഫ് ആകുന്നതിന് ഇടയിലും ശേഷവും ഉണ്ടായ പ്രതിസന്ധികളും അത് തരണം ചെയ്തുള്ള തിരിച്ചുവരവുമാണ് ചിത്രം പറയുന്നത്.
ഏറെ പ്രതീക്ഷയോടെയാണ് ചിത്രം തിയേറ്ററില് എത്തിയതെങ്കിലും ചിത്രം പ്രേക്ഷകരെ ആകര്ഷിച്ചില്ല. അതുകൊണ്ട് തന്നെ അധികനാള് തിയേറ്ററില് തുടരാനും പറ്റിയിട്ടില്ല. അടുത്തിടെയായി പുറത്തിറങ്ങിയ നയന്താര ചിത്രങ്ങള് പലതും പരാജയമായിരുന്നെങ്കിലും ബോളിവുഡ് ചിത്രം ‘ജവാന്’ ഗംഭീര വിജയം നേടിയിരുന്നു.
എന്നാല് പിന്നീട് എത്തിയ ‘ഇരൈവന്’ ബോക്സ് ഓഫീസില് ദുരന്തമായിരുന്നു. ഇരൈവന് പോലെ തന്നെ അന്നപൂരണിയും പരാജയമാവുകയായിരുന്നു. അതേസമയം, ‘രാജാ റാണി’ക്ക് ശേഷം നടന് ജയ്യും നയന്താരയും ഒന്നിച്ച ചിത്രം കൂടിയാണ് അന്നപൂരണി.
സത്യരാജ്, അച്യുത് കുമാര്, കെ.എസ്. രവികുമാര്, റെഡിന് കിങ്സ്ലി, കുമാരി സച്ചു, രേണുക, കാര്ത്തിക് കുമാര്, സുരേഷ് ചക്രവര്ത്തി എന്നിവരാണ് ചിത്രത്തില് മറ്റ് പ്രധാന വേഷങ്ങളില് എത്തിയത്. നീലേഷ് കൃഷ്ണയാണ് ചിത്രത്തിന്റെ രചനയും സംവിധാനവും നിര്വഹിച്ചത്.