ഒരിടവേളയ്ക്ക് ശേഷം കേരളത്തിലെ തിയേറ്ററുകള്‍ നിറഞ്ഞപ്പോള്‍ ആര് മുന്നില്‍ എന്ന ചോദ്യവുമായി സോഷ്യല്‍ മീഡിയ. ആറ് മലയാള സിനിമകളാണ് ഇന്ന് റിലീസ് ചെയ്തത്. ‘നരിവേട്ട’, ‘ഡിറ്റക്ടീവ് ഉജ്ജ്വലന്‍’, ‘ആസാദി’, ‘916 കുഞ്ഞൂട്ടന്‍’, ‘മിസ്റ്റര്‍ ആന്‍ഡ് മിസിസ് ബാച്ചിലര്‍’, ‘പൊലീസ് ഡേ’ എന്നീ ചിത്രങ്ങളാണ് ഇന്ന് തിയേറ്ററുകളില്‍ എത്തിയത്. ടൊവിനോ ചിത്രം നരിവേട്ടയ്ക്കും ധ്യാന്‍ ശ്രീനിവാസന്റെ ഡിറ്റക്ടീവ് ഉജ്ജ്വലനും മികച്ച പ്രതികരണങ്ങള്‍ നേടുമ്പോള്‍ മറ്റ് നാല് സിനിമകളും കൈയ്യടികള്‍ നേടാതെ കടന്നു പോവുകയാണ്.
ടൊവിനോയുടെ കരിയര്‍ ബെസ്റ്റ് എന്ന അഭിപ്രായമാണ് നരിവേട്ടയ്ക്ക് ലഭിക്കുന്ന പ്രതികരണങ്ങള്‍. പതിഞ്ഞ താളത്തില്‍ ആരംഭിച്ച് മികച്ച ഇന്റര്‍വെല്‍ ബ്ലോക്കോടെയാണ് സിനിമയുടെ ആദ്യ പകുതി അവസാനിക്കുന്നതെന്നും വൈകാരിക നിമിഷങ്ങളും ചടുലമായ നിമിഷങ്ങളും ചേര്‍ത്ത് ഗംഭീരമായ രണ്ടാം പകുതിയുമാണ് സിനിമ സമ്മാനിക്കുന്നത് എന്നാണ് പ്രേക്ഷകര്‍ പറയുന്നത്.
അനുരാജ് മനോഹറിന്റെ സംവിധാന മികവിനും വലിയ കയ്യടി ലഭിക്കുന്നുണ്ട്. യഥാര്‍ത്ഥ സംഭവങ്ങളെ ചേര്‍ത്ത് ബ്രില്യന്റായ തിരക്കഥ ഒരുക്കുകയും അതിനെ മികവുറ്റ രീതിയില്‍ അവതരിപ്പിക്കുകയും ചെയ്തിട്ടുണ്ടെന്നും എല്ലാ സാങ്കേതിക മേഖലകളും ഒരുപോലെ തിളങ്ങിയിട്ടുണ്ടെന്നും പ്രേക്ഷകര്‍ പറയുന്നു. ‘മലയാളത്തിന്റെ വിടുതലൈ’ എന്നാണ് നരിവേട്ടയെക്കുറിച്ച് ഒരു പ്രേക്ഷകന്‍ കുറിച്ചത്.
ധ്യാന്‍ ശ്രീനിവാസന്റെ ഡിറ്റക്ടീവ് ഉജ്ജ്വലനും മികച്ച പ്രതികരണങ്ങളാണ് തിയേറ്ററില്‍ നിന്നും നേടുന്നത്. ചിത്രത്തിലെ ധ്യാനിന്റെ അഭിനയത്തെയും സ്‌ക്രിപ്റ്റിനെയും പലരും പ്രശംസിക്കുന്നുണ്ട്. ”ഇത് പൊട്ടുമെന്ന് വിചാരിച്ചിരിക്കുന്നവര്‍ക്ക് കരയാം. ഒന്നൊന്നര തിരിച്ച് വരവുമായി ധ്യാന്‍ ശ്രീനിവാസന്‍. Weekend Cinematic Universe Begins! മലയാളത്തിലെ ആദ്യത്തെ സിനിമാറ്റിക്ക് യൂണിവേഴ്‌സിന്റെ തുടക്കം കൊള്ളാം. ഒരു നോര്‍മല്‍ ഡീറ്റക്റ്റീവ് കഥാപാത്രത്തെ വെച്ച് ഗ്രൗണ്ടഡ് ആയ കഥയില്‍ കോമഡിയില്‍ തുടങ്ങി ത്രില്ലും ട്വിസ്റ്റുമൊക്കെയായി നല്ലൊരു സിനിമ” എന്നാണ് ഒരാള്‍ ഫെയ്‌സ്ബുക്കില്‍ കുറിച്ചത്.
916 കുഞ്ഞൂട്ടനും നല്ല പ്രതികരണങ്ങള്‍ ലഭിക്കുന്നുണ്ട്. ഗിന്നസ് പക്രുവിന്റെ മികച്ച പെര്‍ഫോമന്‍സ്, നടന് വേണ്ടി എഴുതിയ തിരക്കഥ ആണെന്ന് വ്യക്തം, അദ്ദേഹത്തിലെ നായകനെ മുന്‍പെങ്ങും കാണാത്ത വിധത്തില്‍ അവതരിപ്പിക്കാന്‍ സഹായിച്ചിട്ടുണ്ട്. മോശമല്ലാത്ത ത്രില്ലര്‍ എന്ന അഭിപ്രായങ്ങളാണ് സിനിമയ്ക്ക് ലഭിക്കുന്നത്.
അതേസമയം, ശ്രീനാഥ് ഭാസിയെയും വാണി വിശ്വനാഥിനെയും കേന്ദ്ര കഥാപാത്രങ്ങളാക്കി ജോ ജോര്‍ജ് സംവിധാനം ചെയ്ത ചിത്രമാണ് ആസാദി. ഇന്ദ്രജിത്തും അനശ്വര രാജനും ഒന്നിച്ച ചിത്രമാണ് മിസ്റ്റര്‍ ആന്‍ഡ് മിസിസ് ബാച്ചിലര്‍. അനശ്വര പ്രമോഷന്‍ പരിപാടികളില്‍ എത്താതിനാല്‍ സിനിമ വിവാദങ്ങളില്‍ അകപ്പെട്ടിരുന്നു. ടിനി ടോമിനെ നായകനാക്കി നവാഗതനായ സന്തോഷ് മോഹന്‍ പാലോട് ഒരുക്കിയ ചിത്രമാണ് പൊലീസ് ഡേ.