ഏറെ ട്രോള് ചെയ്യപ്പെടുന്ന താരമാണ് നന്ദമൂരി ബാലകൃഷ്ണ. പൊതുവിടങ്ങളിലെ താരത്തിന്റെ പെരുമാറ്റം പലപ്പോഴും വിവാദമാകാറുണ്ട്. പുറത്ത് എത്ര പരുഷമായി പെരുമാറിയാലും അതൊന്നും ഹൃദയത്തില് സൂക്ഷിക്കാത്ത എളിയ മനുഷ്യനാണ് ബാലയ്യ എന്നാണ് സോഷ്യല് മീഡിയ ഇപ്പോള് പറയുന്നത്.
എന്ടിആറിനെയും തെലുങ്ക് ദേശം പാര്ട്ടിയെയും വിമര്ശിച്ച് സംവിധായകന് രാം ഗോപാല് വര്മ്മ ഈയടുത്ത കാലത്ത് ചില സിനിമകള് ചെയ്തിരുന്നു. ‘ലക്ഷ്മീസ് എന്ടിആര്’, ‘അമ്മ രാജ്യംലോ കടപ റെഡ്ലു’ എന്നീ സിനിമകളില് ബാലയ്യെയും വളരെ മോശമായാണ് ആര്ജിവി ചിത്രീകരിച്ചത്.
എന്നാല് ആ അപമാനങ്ങളെല്ലാം മറന്ന് ബാലയ്യ മുന്നോട്ടു പോയി എന്നാണ് പുതിയ റിപ്പോര്ട്ടുകള്. ബാലയ്യയുടെ ‘അണ്സ്റ്റോപ്പബിള് എന്ബികെ’ ഷോയാണ് ശ്രദ്ധ നേടുന്നത്. ‘അണ്സ്റ്റോപ്പബിള് എന്ബികെ’യില് കഴിഞ്ഞ എപ്പിസോഡില് അതിഥികളായി എത്തിയത് നിര്മ്മാതാക്കളായ അല്ലു അരവിന്ദ്, സുരേഷ് ബാബു, സംവിധായകന് കെ രാഘവേന്ദ്ര റാവു എന്നിവരായിരുന്നു.
ഇവരുമായുള്ള സംഭാഷണത്തിനിടെ ടോളിവുഡിലെ കള്ട്ട് സിനിമകളെ കുറിച്ചും സംസാരിക്കുന്നുണ്ട്. ഇതിനിടെ സുരേഷ് ആര്ജിവിയുടെ ‘ശിവ’ എന്ന ചിത്രത്തെ പ്രശംസിച്ചിരുന്നു. ഷൂട്ടിംഗിനിടെ എന്തൊക്കെ സംഭവിക്കുമെന്ന് ആര്ജിവിക്ക് മാത്രമേ നിശ്ചയമണ്ടാവുകയുള്ളു. നിര്മ്മാതാക്കളോട് പോലും പറയില്ല.
ഫൈറ്റ് എക്സിക്യൂഷന്, പശ്ചാത്തല സംഗീതം, ഷോട്ട് എടുക്കല് എന്നിവയുടെ ഗതി ആര്ജിവി സിനിമകളില് മാറ്റിയതിനെ കുറിച്ചും സുരേഷ് ബാബു വിശദീകരിക്കുന്നുണ്ട്. ഇത് കേള്ക്കുന്ന ബാലയ്യയും ആര്ജിവിയെ അഭിനന്ദിക്കുന്നുണ്ട്. സമീപകാലത്ത് തന്നെ അപമാനിച്ചതെല്ലാം മറന്ന് ഒരു സംവിധായകന് എന്ന നിലയില് ആര്ജിവിയുടെ പ്രവര്ത്തനത്തെ ബാലയ്യ അഭിനന്ദിക്കുകയായിരുന്നു.
പലപ്പോഴും വിവാദപരമായ കാര്യങ്ങള് ചെയ്യാറുണ്ടെങ്കിലും വെറുപ്പും പകയും മനസില് വയ്ക്കാതെ എല്ലാം ക്ഷമിച്ച് മുന്നോട്ട് പോകുന്നയാളാണ് ബാലയ്യ എന്നാണ് ഈ എപ്പിസോഡ് കണ്ട് സോഷ്യല് മീഡിയ പറയുന്നത്.